Türkiyə 2025-ci il aprelin 8-dən limon ixracına müvəqqəti qadağa qoyub. Bu qərara səbəb əlverişsiz hava şəraiti, daha doğrusu, ölkənin cənub bölgələrində baş verən qəfil şaxtalar və daxili bazarın ehtiyacları üçün kifayət qədər miqdarda sitrus meyvələri ilə təmin etmək istəyi olub.
AzPost xəbər verir ki, bu barədə bu il aprelin 7-də Türkiyənin Ticarət Nazirliyi məlumat yayıb.
Bu qərar Kənd Təsərrüfatı və Meşə Təsərrüfatı Nazirliyi ilə sıx əməkdaşlıq nəticəsində qəbul edilib. Məqsəd gözlənilməz iqlim dəyişikliyi şəraitində ölkə daxilində limona tələb və təklif arasında tarazlığı sabitləşdirməkdir. Nazirlikdən verilən rəsmi açıqlamada şaxtanın Türkiyənin cənub bölgəsində yerləşən Mersin, Adana və Hatay kimi əsas kənd təsərrüfatı vilayətlərinə təsir etdiyi vurğulanıb. Nazirlik həmçinin əmin edib ki, vəziyyət yaxşılaşarsa və hava şəraiti sabitləşərsə, ixracın dayandırılması ilə bağlı qərar ən qısa zamanda nəzərdən keçirilə və ləğv edilə bilər.
Xatırladaq ki, limon və naringi Türkiyənin sitrus meyvələrinin ixracının strukturunda lider mövqeləri tutur və tədarükün ümumi həcminin təxminən 70%-ni təşkil edir. Portağal isə öz növbəsində ixrac bazarının 15%-ni təşkil edir. Rusiya Federasiyası Türkiyə limonunun əsas idxalçılarından biridir və ənənəvi olaraq tərəfdaş ölkələr siyahısında ilk sıraları tutur.
