Fuad Kimya Servis
Şirvan Apellyasiya Məhkəməsində xuliqanlıqda təqsirləndirilən İmran Balaşovun (ad, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Pərviz Hacıyevin sədrliyi ilə keçirilən prosesdə qərar elan olunub.
Qərara əsasən, apellyasiya şikayəti təmin edilib, Füzuli Rayon Məhkəməsinin 03 dekabr 2024-cü il tarixli hökmü cəza hissəsində dəyişdirilib. Təqsirləndirilən şəxs təqsirli bilindiyi Cinayət Məcəlləsinin 221.1-ci (xuliqanlıq) maddəsi ilə təyin olunmuş azadlığın məhdudlaşdırılması (elektron qolbaq) cəzası 1000 manat məbləğində cərimə cəzası ilə əvəz olunub.
İttihama görə, hadisə 09 iyun 2024-cu il tarixdə, saat 03:30 radələrində Füzuli rayonu, 1 saylı Qayıdış qəsəbəsində, mal-qara satışı bazarının kənarında yerləşən “Şuşa yolu” restoranında qeydə alınıb.
Belə ki, İmran Balaşov zərərçəkmiş M.M-in (ad, soyadı şərtidir) xidmətçi işlədiyi sözügedən restoranda tanışı ilə yeyib-içib. Sonra o, həmin restoranı işlədən şəxsdən hesabı soruşub. O da təqsirləndirilən şəxsə 28 manat məbləğində pul ödəməli olduğunu deyib. Bu zaman İmranın tanışı 25 manat məbləğində pul verə biləcəyini qeyd edib. İcarədar da onunla razılaşıb. Sonra zərərçəkmiş şəxs İmrana “30 manat ver, 2 manat da mənə qalsın” deyib. Bu sözdən sonra sərxoş vəziyyətdə olan təqsirləndirilən şəxs M.M.-n ünvanına nalayiq sözlər deyib, səs-küy salıb. Daha sonra o, zərərçəkmişin sifət nahiyəsinə şillə ilə bir dəfə qəsdən zərbə vurub.
Hadisədən sonra İmran Balaşov saxlanılaraq cinayət məsuliyyətinə cəlb edilib.
