Həbs
Rusiyanın Stavropol vilayətində geniş rezonans doğuran cinayət işi məhkəməyə göndərilib. AzPost xəbər verir ki, bölgənin keçmiş deputatı Roman Saviçev və onun iki şəriki ümumilikdə 52 milyon rubl məbləğində vəsaiti mənimsəməkdə ittiham olunurlar.
Stavropol prokurorluğunun yaydığı məlumata görə, cinayət işi Stavropol diyar Dumasının keçmiş deputatı Roman Saviçev və Moskvanın iki sakini barəsində açılıb. İstintaq materiallarında bildirilir ki, təqsirləndirilən şəxslər Stavropol sakininə yaxın qohumunun cinayət məsuliyyətindən azad oluna biləcəyini vəd ediblər. Bunun qarşılığında isə ondan 50 milyon rubl tələb ediblər.
Bundan əlavə, Roman Saviçev daha əvvəl “Xüsusi Hərbi Operasiya” (SVO) iştirakçılarından birindən borc adı ilə aldığı 2,5 milyon rubl vəsaiti də qaytarmayıb. Hüquq-mühafizə orqanlarının əməkdaşlarının apardığı araşdırmalar nəticəsində bu məbləğin də şəxsi məqsədlər üçün xərcləndiyi müəyyən edilib.
RİA Novosti agentliyi hüquq-mühafizə orqanlarındakı mənbəyə istinadən bildirib ki, söhbət məhz Stavropol diyarı Dumasının keçmiş deputatı Roman Saviçevdən gedir. Onun adı bundan öncə də maliyyə maxinasiyaları və müxtəlif korrupsiya halları ilə bağlı mətbuatda hallanıb.
Hazırda cinayət işinin materialları Stavropol diyar məhkəməsinə göndərilib. Təqsirləndirilən şəxslər barəsində hansı qərarın veriləcəyi yaxın günlərdə bəlli olacaq. Prokurorluq onların əməllərində “xüsusilə külli miqdarda dələduzluq” maddəsi ilə cinayət tərkibi olduğunu bildirib.
