Gəncə şəhərində ailələrarası mübahisə ciddi insidentlə nəticələnib. Məlumata görə, dörd ay əvvəl gəlin köçürülən evdə qudalar arasında yaranan sözlü mübahisə fiziki toqquşmaya çevrilib.
Hadisə gecə saat ikilərdə Məhsəti qəsəbəsində baş verib. Mübahisə zamanı tərəflər bir-birinə hücum edib və nəticədə altı nəfər müxtəlif dərəcəli bədən xəsarətləri alıb. Davanın daha da böyüməsinin qarşısı isə hadisəyə müdaxilə edən qonşular tərəfindən alınıb.
Xəsarət alanlar arasında Kəlbəcər rayon sakinləri – 45 yaşlı Əli Alışanov, həyat yoldaşı Aynur Alışanova və 20 yaşlı oğlu Amil Alışanov da var. Xəstəxanaya yerləşdirilən şəxslərdən beşinin vəziyyəti qənaətbəxş hesab olunub və onlar ambulator müayinə üçün evə buraxılıblar.
Əli Alışanovun vəziyyəti isə kritik olaraq qiymətləndirilir. O, hazırda Akademik Zülfüqar Məmmədov adına xəstəxananın reanimasiya şöbəsində müalicə alır.
Faktla bağlı hüquq-mühafizə orqanları araşdırmalara başlayıb. Hadisənin motivləri və iştirakçılarının sayı dəqiqləşdirilir.
