Diş
Diş pozuntularını düzəltmək artıq mütləq şəkildə breket taxmağı tələb etmir. AzPost bildirir ki, müasir ortodontik texnologiyalar sayəsində bu problemi daha komfortlu və estetik alternativlərlə aradan qaldırmaq mümkündür. Mövzu ilə bağlı ortodont və Avrokappa Akademiyasının spikeri Mane Oqanesyan “Championship” nəşrinə danışıb.
Onun sözlərinə görə, breketlərə alternativ kimi fərdi düzəldicilər (alignerlər) son illərdə böyük populyarlıq qazanıb. Xəstələr təkcə estetik səbəblərlə deyil, həm də breketlərin yaratdığı diskomfort və çətinliklər səbəbilə bu variantı üstün tuturlar.
Alignerlər rəqəmsal 3D texnologiya ilə fərdi olaraq hazırlanır, diş səthinə dəqiq təzyiq tətbiq edir və tədricən dişlərin ideal vəziyyətə gəlməsinə səbəb olur. Onlar şəffaf, çıxarıla bilən və demək olar ki, görünməzdir, həmçinin ağız selikli qişasına zərər vermir.
Mane Oqanesyan qeyd edib ki, diş minasının zərif olduğu, yaxud diş əti problemləri yaşayan pasiyentlər üçün alignerlər daha təhlükəsiz və məqsədəuyğundur. Bu alternativ, həmçinin fiziki aktiv həyat tərzi keçirən şəxslər – xüsusilə də idmançılar üçün ideal seçim sayılır. Çünki metal elementlər olmadığından travma riski də yoxdur.
Bununla belə, mütəxəssis xəbərdarlıq edir ki, alignerlər breketlərdən daha rahat olsa da, daimi nizam-intizam tələb edir. Onlar gün ərzində ən az 20–22 saat istifadə olunmalı, mütəmadi olaraq həkim nəzarətindən keçilməli və bütün tövsiyələrə ciddi əməl edilməlidir.
