Buzlaq
Alimlər buzlaqların əriməsinin dünya üzrə partlayıcı vulkan püskürmələrinin artması ilə nəticələnə biləcəyi barədə xəbərdarlıq ediblər.
AzPost xəbər verir ki, Çilidə aparılan son araşdırma bu təhlükənin təkcə Antarktida deyil, Rusiyanı da əhatə etdiyini göstərib.
Mütəxəssislərin sözlərinə görə, iqlim dəyişikliyi nəticəsində buzlaqların sürətlə əriməsi yerin dərin qatlarında yerləşən maqma kameralarının üzərindəki təzyiqi azaldır. Nəticədə, maqma daha asan şəkildə səthə çıxır və bu da partlayıcı püskürmələrin baş vermə riskini artırır. Bu prosesin İslandiya kimi vulkanik adalarda artıq müşahidə edildiyi bildirilib.
Tədqiqatçılar vurğulayıb ki, bu təhlükə təkcə İslandiya və Çili ilə məhdudlaşmır. Qərbi Antarktida buzlaqlarının altında ən azı 100 aktiv vulkan gizlənir. Qlobal istiləşmə davam edərsə, yaxın onilliklərdə bu buzlaqların əriməsi nəticəsində həmin vulkanların aktivləşməsi real təhlükəyə çevriləcək.
Alimlərin fikrincə, bu cür püskürmələr təkcə yerli ərazilərə deyil, bütün planetin iqlim balansına təsir edə bilər. Vulkan püskürmələri zamanı atmosferə atılan kül və hissəciklər günəş işığını əks etdirərək havanı müvəqqəti soyutsa da, eyni zamanda karbon qazı və metan kimi istixana qazlarının atmosferə qarışması planetin daha da isinməsinə səbəb olacaq.
Mütəxəssislər xəbərdarlıq edir ki, bu dövri proses – istiləşmənin buzları əridib, daha çox püskürmələrə və əlavə istixana qazlarının atmosferə yayılmasına səbəb olması – gələcəkdə qlobal iqlim böhranını daha da sürətləndirə bilər.
