həbs
Rusiya istintaq orqanları Moskvanın Koptevo rayonunda fəaliyyət göstərmiş polis idarəsinin sabiq rəisi Aleksandr Koskonun həbsini tələb ediblər. AzPost xəbər verir ki, o, tabeliyində olan əməkdaşın cinsi zorakılıqla bağlı cinayətinə göz yummaqda və vəzifə səlahiyyətlərindən şəxsi məqsədlər üçün sui-istifadə etməkdə ittiham olunur.
Savelovski Rayon Məhkəməsi Kosko barəsində həbs-qətimkan tədbiri seçilməsi ilə bağlı vəsatətə baxacaq. İttihamlar Rusiya Cinayət Məcəlləsinin 286-cı maddəsinin 3-cü bəndinin “e” hissəsinə əsaslanır ki, bu da vəzifəli şəxsin şəxsi maraqlarla səlahiyyətlərini aşması deməkdir.
İş üzrə qalmaqal 2024-cü ilin noyabrında başlayıb. Məlumata görə, iki gənc qız Timiryazevski parkında saxlanılıb. Onlardan biri sərbəst buraxılsa da, digəri polis əməkdaşının cinsi təcavüzünə məruz qaldığını bildirib. Hadisədən sonra zərərçəkmiş qız Daxili İşlər Nazirliyinin Moskva üzrə Daxili Təhlükəsizlik Xidmətinə müraciət edib.
Nəticədə patrul əməkdaşı barəsində cinayət işi açılıb, polis rəisi isə vəzifəsindən azad edilib. İndi isə Koskonun bu hadisəyə səssiz qalması və tabeliyindəki əməkdaşın hərəkətlərinə göz yumması istintaq orqanları tərəfindən vəzifə səlahiyyətlərindən sui-istifadə kimi qiymətləndirilir.
