Birmarket
Vətəndaş Azər Rzayev “Umico” (Birmarket) onlayn ticarət platformasından aldığı televizorla bağlı ciddi problemlə üzləşdiyini bildirir. AzPost-un məlumatına görə, o, aprelin iyirmi dördündə sifariş etdiyi televizoru yalnız aprelin otuzunda – ad günü üçün nəzərdə tutulduğundan – açıb və həmin vaxt ekranın sınıq olduğunu görüb.
Şikayətçinin sözlərinə görə, o, dərhal “Umico”ya müraciət edib, lakin ona “altı gün gec müraciət etmisiniz, televizoru siz sındırmısınız” cavabı verilib. Azər Rzayev qeyd edir ki, bu qərarı yalnız ekspertiza müəyyən edə bilər, lakin şirkət nə məhsulu geri götürüb, nə də müstəqil ekspertizaya göndərib.
Məsələ ilə bağlı o, əvvəlcə İstehlak bazarına nəzarət agentliyinə müraciət etsə də, qurumun mövqeyi satıcının tərəfini müdafiə etmək olub. Daha sonra insan hüquqları təşkilatlarına müraciətdən sonra televizor ekspertizaya göndərilib.
Şikayətçi deyir ki, nəticə barədə ona rəsmi sənəd təqdim olunmayıb, sadəcə ekspertiza rəyinə əsasən televizorun guya alıcının günahı üzündən qırıldığı bildirilib. Üstəlik, cihazın özü də geri qaytarılmır.
Azər Rzayev iddia edir ki, “Umico” əvvəlcə ona ödənilmiş məbləğin əlli faizini qaytarmağı təklif edib. Lakin sonradan bu vəd də yerinə yetirilməyib. Beləliklə, alıcı nə pulunu ala bilir, nə də məhsuldan istifadə edə bilir.
Qarşı tərəfin mövqeyini dərc etməyə hazırıq.
