ABŞ-ın sahil zolağında həyətindən çıxıb itib-batmış labrador bir saatdan artıq axtarışlardan sonra okeanın ortasında aşkar edilib.
AzPost.az xəbər verir ki, hadisə noyabrın 23-də baş verib. Sahibləri Aleksis və Brendon evlərinin həyətində sakitcə gəzən “Sedi” adlı qara labradorun birdən-birə yoxa çıxmasını görüb. Onlar dərhal itə taxılmış izləmə qurğusunun işarəsini aktivləşdiriblər. Siqnal heyvanın evdən təxminən 1,6 kilometr aralıda yerləşən çimərlik istiqamətinə hərəkət etdiyini göstərib.
Cütlük sahilə çatanda təsadüfən bir sörfçü ilə qarşılaşıb. O, qara itin dalğalarla açıq dənizə doğru sürükləndiyini gördüyünü deyib. Məlumat dərhal xilasedicilərə ötürülüb və onların qayığı axtarış üçün həmin əraziyə yönləndirilib.
Axtarışlar çətin şəraitdə aparılıb: güclü axın qayığı geriyə çəkir, dalğaların yaratdığı bulanıqlıq isə görünüşü xeyli zəiflədir. Təxminən bir saatdan sonra xilasetmə qrupu geri qayıtmağa hazırlaşarkən suyun üzərində tünd ləkə kimi görünən bir cismi sezib. Yaxınlaşdıqda bunun Sedinin özü olduğu müəyyənləşib — it dalğaların arasında yavaş-yavaş açıq sulara tərəf sürüklənirmiş.
Xilasedicilər labradoru təhlükəsiz şəkildə qayığa qaldırıb sahilə çıxarıblar. Onların sözlərinə görə, heyvan xeyli yorğun və üşümüş olsa da, insanlara tərəf canatmağı dayandırmırmış. Sedi sahildə sahiblərinə təhvil verilib.
Aleksis və Brendon ev heyvanlarının sağ-salamat tapılmasına sevinclərini gizlətməyiblər. Onlar xilasedicilərə və məlumat verən sörfçüyə təşəkkür ediblər.
