Soyuğa qarşı allergiya səbəbsiz yaranmır və əksər hallarda orqanizmdə mövcud olan sağlamlıq problemləri ilə əlaqəli olur. Həkim Aleksandr Umnov bildirib ki, bu tip allergik reaksiyanın yaranma riski xroniki xəstəlikləri olan şəxslərdə, eləcə də uzun müddət soyuq şəraitdə çalışan insanlarda daha yüksəkdir. AzPost xəbər verir ki, bu barədə NEWS.ru yazır.
Mütəxəssisin sözlərinə görə, yuxarı tənəffüs yollarının və bağırsaqların xroniki xəstəlikləri, mikroqan dövranının pozulması, psoriaz, neyrodermatit, eləcə də immunstimulyatorların nəzarətsiz qəbulu soyuq allergiyasını yarada bilər. Bundan başqa, ailə üzvlərində bronxial astmanın olması və uzun müddət soyuqda işləmək də bu riskləri artıran amillər sırasındadır.
Aleksandr Umnov qeyd edib ki, soyuq allergiyasının əlamətləri daha çox bədənin açıq hissələrində — üz, qulaq və əllərdə özünü göstərir. Ən çox rast gəlinən simptomlar dərinin qızarması, şişkinlik və qaşınmadır. Qaşınma zamanı dərinin zədələnməsi qabıqların və iltihabın yaranmasına səbəb olur ki, bu da vəziyyəti daha da ağırlaşdırır.
Həkimin sözlərinə görə, soyuq allergiyası təkcə dəri ilə məhdudlaşmır. Bəzi hallarda burun axıntısı, asqırma, göz yaşarması, konyunktivit müşahidə olunur. Daha ağır vəziyyətlərdə isə bronxospazm və nəfəsalma çətinliyi yarana bilər.
Mütəxəssislər bu əlamətlər müşahidə olunduqda vaxtında həkimə müraciət etməyi tövsiyə edirlər.
