Sosial şəbəkələrdə olduqca sadə, amma nəticəsi ilə təəccübləndirən yeni desert trendə çevrilib. Yaponiyada viral olan iki inqrediyentli çizkeyk resepti yalnız yunan yoqurtu və peçenyedən hazırlanır. Buna baxmayaraq, teksturası və dadı klassik çizkeyki xatırlatdığı üçün qısa zamanda milyonlarla istifadəçinin diqqətini cəlb edib.
AzPost trendə çevrilən bu şirniyyatın hazırlanma qaydasını və fərqli cəhətlərini təqdim edir.
Yeni desertin unikallığı nədədir?
Bu desert TikTok və Instagram platformalarında fəal şəkildə paylaşılan videolar sayəsində məşhurlaşıb. Onun əsas sirri ondadır ki, peçenye yoqurtun nəmini özünə çəkərək tədricən yumşalır və bişirməyə ehtiyac qalmadan kremvari, zərif bir kütləyə çevrilir. Məhz sadə hazırlanması və əldə olunan nəticə bu resepti ayın ən populyar desertlərindən birinə çevirib.
Trendin müəllifləri etiraf edirlər ki, əvvəlcə sobasız çizkeyk əldə etməyin mümkün olduğuna inanmaq çətin görünür. Lakin ilk dadımdan sonra şübhələr aradan qalxır. Bu desert klassik pendirli və biskvit əsaslı çizkeyki tam əvəz etməsə də, yoqurt sevənlər üçün yüngül və sürətli alternativ hesab olunur.
Desert necə hazırlanır?
Resept üçün istənilən təbii yoqurtdan istifadə etmək mümkündür, lakin ən yaxşı konsistensiya məhz yunan yoqurtu ilə əldə olunur. Əgər yalnız adi və ya bitki mənşəli yoqurt varsa, onu süzmək və ya bir qədər krem-pendir əlavə etmək tövsiyə edilir. Həm yağsız, həm də yağlı yunan yoqurtu istifadə oluna bilər. Yağ faizi nə qədər yüksəkdirsə, desertin dadı bir o qədər “çizkeykə bənzər” alınır.
Yaponiyada əsasən kokoslu sable peçenyelərindən istifadə olunur. Avropa və Ukraynada isə onları asanlıqla Biscoff, Oreo və ya istənilən quru peçenye ilə əvəz edirlər. Məhz bu növ peçenyelər bişirilməyən desertlər üçün ən uyğun variant sayılır.
Sadə hazırlanması və yüngül dadı ilə seçilən bu desert xüsusilə sürətli və praktik şirniyyat axtaranlar üçün ideal seçim kimi dəyərləndirilir.
