Rusiya Xarici İşlər Nazirliyi Fars körfəzində kollektiv təhlükəsizliyin təmin edilməsi üzrə yenilənmiş Konsepsiya dərc edib.
Azpost.info bildirir ki, sənəd nazirliyin veb saytında yerlşdirilib.
Nazirlik bildirib ki, İranla bağlı münaqişə fonunda region kəskin böhran vəziyyətindədir. Moskva gərginliyi azaltmaq üçün kollektiv siyasi və diplomatik səylərin və regiondakı bütün ölkələrin maraqlarını nəzərə alan yeni təhlükəsizlik arxitekturasının zəruri olduğuna inanır.
Sənəddə Rusiya Fars körfəzində tədricən inklüziv təhlükəsizlik sisteminin yaradılmasını təklif edir. Prioritet məqsədlər arasında Hörmüz boğazında naviqasiya azadlığı, nüvə silahının yayılmamasına sadiqlik və terrorizmə qarşı birgə mübarizə var.
Moskva həmçinin regiondakı və regiondan kənar ölkələrə hərbi sahədə etimad quruculuğu tədbirləri hazırlamağı təklif edir. Xüsusilə bunlara daha çox şəffaflıq, silahlara nəzarət, silahsızlaşdırılmış zonaların yaradılması və qonşu ölkələrə hücumlar üçün körfəz ərazisinin istifadəsinin qarşısının alınması daxildir. Rusiya həmçinin Yaxın Şərqi və Şimali Afrikanı kütləvi qırğın silahlarından və onların çatdırılma vasitələrindən azad zonaya çevirmək üçün addımlar atılmasını müdafiə edib.
Konsepsiyada Fars körfəzi, Ərəbistan dənizi, Oman körfəzi və Hörmüz boğazında naviqasiya təhlükəsizliyinə xüsusi diqqət yetirilir. Moskva beynəlxalq dəniz hüququna əsaslanmağı və gəmilərin və onların heyətlərinin təhlükəsizliyinə üstünlük verməyi təklif edir.
Aydın Əliyev
