Britaniyalı alimlər insanların şənbə və bazar günləri iş günləri ilə müqayisədə daha çox riskli qərarlar verdiyini müəyyən ediblər.
Azpost.info-nun məlumatına görə, araşdırma nəticələri göstərir ki, istirahət günlərində insanların beynində dopamin hormonunun səviyyəsi artır. Bu isə yeni təcrübələrə açıq olmağı və risk etmə meylini gücləndirir. Tədqiqatı aparan London Universitet Kollecinin neyropsixoloqu doktor Sofi Skott bildirib ki, həftəsonu insan beynində “mükafat gözləntisi” hissi daha aktiv olur.
Alimlər 12 min nəfərin davranışlarını analiz ediblər. Məlum olub ki, insanlar həftəsonu yeni restoran seçmək, qeyri-adi yeməklər dadmaq, daha uzaq məsafəyə səyahət etmək və hətta maliyyə qərarlarında risk etmək ehtimalına daha çox malikdirlər.
Maraqlıdır ki, ABŞ-ın Nevada Universitetində aparılmış başqa bir araşdırma da oxşar nəticə verib. Araşdırmaya görə, lotereya biletlərinin satışının təxminən 40 faizi məhz şənbə və bazar günlərinə təsadüf edir.
Psixoloqlar hesab edirlər ki, insan beyni istirahət günlərini “azadlıq dövrü” kimi qəbul edir və bu da qərarverməyə təsir göstərir.
Sunay Aydın
