BMT-nin Beynəlxalq Dəniz Təşkilatının (IMO) İdarəetmə Şurası ölkələri İranın Hörmüz boğazı üzərində suverenlik iddialarını və gəmi hərəkətinə nəzarət etmək üçün yaratdığı qurumu tanımamağa çağırıb.
“Reuters“ xəbər verir ki, bu barədə təşkilatın cümə günü qəbul etdiyi sənəddə qeyd olunub.
Sənəddə bildirilir ki, dövlətlər İranın Hörmüz boğazı üzərində nəzarəti birtərəfli qaydada ələ keçirmək cəhdlərini rədd etməlidir. Şura həmçinin Tehranın boğazdan keçən gəmilərin hərəkətini idarə etmək məqsədilə yaratdığı qurumu da “birtərəfli qərar” kimi qiymətləndirib.
Məsələ bu həftə Londonda yerləşən Beynəlxalq Dəniz Təşkilatının 40 üzvdən ibarət İdarəetmə Şurasının iclasında müzakirə olunub. Müzakirələr zamanı Körfəz ölkələri, ABŞ və İran arasında Hörmüz boğazının gələcəyi ilə bağlı fikir ayrılığı yaşanıb.
ABŞ-ın İrana endirdiyi hava zərbələri və Vaşinqtonun Tehranı ticarət gəmilərinə hücumlarda ittiham etməsindən sonra bölgədə gərginlik yenidən artıb. Bu vəziyyət qlobal neft tədarükü və dəniz daşımaları ilə bağlı narahatlıqları gücləndirib, həmçinin ABŞ və İran arasında davam edən danışıqlar fonunda əldə olunmuş müvəqqəti atəşkəsin kövrək olduğunu bir daha göstərib.
Qeyd edək ki, BMT-nin Beynəlxalq Dəniz Təşkilatı (IMO) beynəlxalq gəmiçiliyin təhlükəsizliyi, mühafizəsi və dəniz mühitinin çirklənməsinin qarşısının alınmasına cavabdeh qurumdur və 176 üzv dövləti birləşdirir.
