Bosniya və Herseqovina serblərinin keçmiş komandanı, “Bosniya qəssabı” ləqəbli Ratko Mladiç 85 yaşında vəfat edib.
Reuters-in məlumatına görə, Mladiç Haaqada BMT-yə məxsus saxlanma müəssisəsində ömürlük həbs cəzasını çəkirdi. Onun ölümü barədə Serbiyanın “Informer” televiziyası məlumat yayıb.
Mladiç 1992-1995-ci illərdə Bosniya müharibəsi zamanı Bosniya serblərinin ordusuna rəhbərlik edib. O, müharibə dövründə törədilmiş ən ağır cinayətlərin əsas təşkilatçılarından biri hesab olunurdu.
16 il gizləndi
Ratko Mladiç müharibədən sonra uzun müddət gizlənib. Onun yeri yalnız 2011-ci ildə müəyyənləşdirilib və bundan sonra Haaqadakı Beynəlxalq Cinayət Tribunalına təhvil verilib.
2017-ci ildə tribunal Mladiçi soyqırımı, müharibə cinayətləri və bəşəriyyətə qarşı cinayətlərdə təqsirli bilərək ömürlük həbs cəzasına məhkum edib.
Onun barəsindəki hökm əsasən Bosniya müharibəsi zamanı törədilmiş kütləvi qətllər və digər ağır cinayətlərlə bağlı olub.
Srebrenitsa qətliamının əsas simalarından biri
Mladiçin adı xüsusilə 1995-ci ilin iyulunda Srebrenitsada törədilən qətliamla bağlıdır.
İyulun 11-də Bosniya serblərinin qüvvələri Srebrenitsaya daxil olduqdan sonra bosniyalı müsəlmanlara qarşı kütləvi qətllər həyata keçirilib. Bir neçə gün ərzində 8 mindən çox bosniyalı kişi və oğlan öldürülüb. Reuters də Srebrenitsa qətliamında 8 mindən çox bosniyalı müsəlman kişi və oğlanın öldürüldüyünü bildirir.
Keçmiş Yuqoslaviya üzrə Beynəlxalq Cinayət Tribunalı Srebrenitsa hadisələrini soyqırımı kimi qiymətləndirib.
Ratko Mladiçin ölümü ilə Balkanların ən qanlı müharibələrindən birinin əsas hərbi simalarından biri də həyatını başa vurub. Onun məhkəməsi isə beynəlxalq ədliyyə tarixində ən mühüm soyqırımı işlərindən biri kimi qiymətləndirilir.
Nadir
