Beyin
Siqaret çəkmək beyin funksiyalarının zəifləməsinə səbəb olan ən güclü amillərdən biridir. AzPost bildirir ki, bu qənaətə London Universitet Kollecinin tədqiqatçıları gəlib. Onlar yaşı əlli və yuxarı olan otuz iki min avropalının on illik məlumatlarını təhlil ediblər.
Araşdırmanın nəticələri “Nature Communications” jurnalında dərc olunub. Tədqiqat siqaret çəkənlərin bilişsel funksiyalarının siqaret çəkməyənlərlə müqayisədə səksən beş faiz daha sürətlə azaldığını göstərib. İştirakçılar yaddaş və şifahi ifadə testlərindən keçirilib və nəticələr arasında ciddi fərq aşkarlanıb.
Bununla belə, alimlər maraqlı bir istisna da qeyd ediblər: sağlam həyat tərzi keçirən siqaret çəkənlərdə zehni zəifləmə o qədər də sürətli olmur. Mütəmadi fiziki aktivlik, sosial həyat və alkoqoldan orta səviyyədə istifadə beyin fəaliyyətini müəyyən qədər qoruyur.
Tədqiqatın rəhbəri Mişela Blumberq bildirib ki, siqaret sürətlənmiş idrak qocalmasının ən təhlükəli səbəblərindən biridir. Amma siqaretdən imtina edə bilməyənlər üçün sağlam həyat tərzini qorumaq zərərləri müəyyən qədər azalda bilər.
Alimlər xəbərdarlıq edirlər ki, yaş artdıqca zehni çeviklik və yaddaşın qorunması üçün ən effektiv yol siqaretdən tamamilə uzaq durmaqdır. Bu, həm idrak bacarıqlarını, həm də ümumi beyin sağlamlığını uzun müddət saxlamaq üçün əsas şərt sayılır.
