Romada 24 yaşlı alman turist qədim Roma əsərini elektrikli skuterlə daşıdığı üçün polis tərəfindən saxlanılıb. Hadisə ABŞ səfirliyinin yaxınlığındakı məşhur Via Veneto küçəsində baş verib.
AzPost-un CNN-ə istinadla məlumatına görə, İtaliya polisi gənci skuterlə hərəkət etdiyi zaman onun ayaqları arasında yerləşən mərmər artefaktı görərək onu təqib etməyə başlayıb. Təxminən otuz kiloqram çəkisi olan bu mərmər parçanın qədim Roma dövrünə aid olduğu ehtimal edilir.
İtaliya mətbuatının yazdığına görə, artefakt bir sütunun altlığıdır və tarixi baxımdan əhəmiyyət kəsb edir. İtaliyanın tanınmış arxeoloqları bu əsərin mənşəyini müəyyənləşdirmək üçün araşdırmalara başlayıblar.
Polisin məlumatına görə, alman turist bu obyektin “suvenir” olduğunu deyib, lakin onun bu əşyanı kimdən və necə əldə etdiyi hələ ki məlum deyil. Hazırda “oğurlanmış mədəni sərvətlərin alınması” maddəsi ilə istintaq aparılır. Turistin adı açıqlanmayıb və hələlik ona qarşı rəsmi ittiham irəli sürülməyib.
İtaliya hakimiyyət orqanları son illərdə turistlərin mədəni irsə qarşı məsuliyyətsiz davranışlarını mütəmadi olaraq gündəmə gətirirlər. Bundan əvvəl də bəzi turistlər Kolizeyin divarlarını cızmaq, İspan pilləkənlərindən maşınla qalxmaq və ya qədim yerlərdə motosiklet sürmək kimi hallara görə cərimələniblər.
Arxeoloji obyektlərlə belə davranışlar İtaliya qanunvericiliyinə görə ciddi məsuliyyət yaradır və turizm sektoruna da mənfi təsir göstərir.
