ASAN xidmət
ASAN xidmət mərkəzlərində informasiya texnologiyaları avadanlıqlarının texniki dəstəyi üçün ayrılan vəsaitin məbləği açıqlanıb.
AzPost xəbər verir ki, Vətəndaşlara Xidmət və Sosial İnnovasiyalar üzrə Dövlət Agentliyi bu məqsədlə 466 min 189 manat büdcə ayırıb.
Texniki dəstək xidmətlərinin göstərilməsi üçün Agentlik “Optima Business Solutions” MMC ilə müqavilə imzalayıb. Müqaviləyə əsasən, şirkət “ASAN xidmət” mərkəzlərində istifadə olunan kompüter sistemləri, şəbəkə avadanlıqları və digər İT infrastrukturu üzrə texniki xidmət göstərəcək.
Araşdırmalar göstərir ki, son 6 ayda “ASAN xidmət” strukturları ümumilikdə bir milyondan artıq məbləğə dörd böyük tender həyata keçirib. Hər tender müxtəlif sahə üzrə ixtisaslaşmış şirkətlərin qalibiyyəti ilə yekunlaşıb.
Məsələn, aprel ayında təhlükəsizlik kameralarının texniki dəstəyi üzrə keçirilən tenderi “Standard Tech” MMC, fevralda şəbəkə infrastrukturunun modernləşdirilməsi üzrə tenderi isə “ProNet Solutions” MMC udub. Bundan başqa, dekabr ayında rəqəmsal imza sistemlərinə texniki xidmət tenderinin qalibi “SecureIT” MMC olub.
Bu tenderlərin ümumi dəyərinin 1.2 milyon manata yaxın olduğu bildirilir.
Qeyd edək ki, “ASAN xidmət” mərkəzləri ölkə üzrə ən çox vətəndaş müraciəti qəbul edən və rəqəmsal xidmət sahəsində nümunəvi sayılan dövlət qurumlarından biridir.
