Azərbaycanın Əhli-Beyt təmsilçiləri İrana qarşı etiraz bəyanatı verib

12 Oktyabr 2021 - 16:02

Azərbaycan Seyid Ocaqları İranın və bu ölkədəki din adından çıxış edən müxtəlif mərkəz və şəxslərin Azərbaycana qarşı davranışları və çıxışlarına etiraz olaraq bəyanatla çıxış edib.

Bəyanatda qeyd olunur ki, Müzəffər Ali Baş Komandan İlham Əliyevin rəhbərliyi və qalib Azərbaycan Ordusunun şücaəti ilə 44 günlük Vətən müharibəsi tarixi zəfərlə nəticələnib. Azərbaycan Ordusunun imana silah kimi sarılan qəhrəman zabit və əsgərləri bu haqlı savaşımızda öz canları və qanları hesabına tarix yazaraq şəhid və qazi oldular: “Müharibə dönəmində qardaş və dost ölkələr Azərbaycana siyasi və mənəvi dəstək verdiyi halda qonşu və müsəlman ölkəsi olan İranın tutduğu yanlış mövqe Azərbaycanın Əhli-Beyt təmsilçiləri tərəfindən hiddətlə qarşılandı. Seyid Ocaqları olaraq təəssüf edirik ki, tarixi zəfərdən sonra da rəsmi İranın və bu ölkədəki din adından çıxış edən müxtəlif mərkəz və şəxslərin müsəlman ölkəsi olan Azərbaycana qarşı davranışları və çıxışları davam edir. Həmçinin İran hökumətinin və oradakı müxtəlif dairələrin işğalçı Ermənistana və Qarabağdakı separatçılara dəstəyini görməkdəyik”.

Bəyanatda vurğulanır ki, İslam dünyasında özünü Əhli-Beyt himayəçisi kimi göstərən İranın həqiqi Əhli-Beyt yurdu olan Azərbaycana deyil, vaxtı ilə işğal altındakı tarixi torpaqlarımızda mövcud olan məscidlərimizdə donuz bəsləyən və xalqın and yeri sayılan Seyidlərin ziyarətgahlarını təhqir edən təcavüzkar Ermənistana 30 il ərzində dəstək verməsi Allahın hökmlərinə zidd əməldir. Qeyd olunur ki, İranın Allah evlərini təhqir etmiş Ermənistana bu cür münasibəti həm də Azərbaycandakı Peyğəmbər (s) və Əhli-Beyt sevərlərinə qarşı təhqir və hörmətsizlikdir:

“Biz illərdir ki, İranın və oradakı təxribatçı mərkəzlərin Azərbaycana qarşı haqsız mövqeyinin dəyişəcəyinə ümid etsək də, lakin bunun əksini gördük.

Azərbaycan Əhli-Beyt təmsilçiləri olaraq son günlər İranın və oradakı təxribatçı mərkəzlərin ölkəmizə qarşı davamlı səsləndirdiyi əsassız və sübutsuz iddiaları hiddət və qəzəblə rədd edirik. Xalqın ehtiram və sevgi bəslədiyi Azərbaycan Seyid Ocaqları olaraq bəyan edirik ki, dünyəvi ölkə olan Azərbaycanda milli və mənəvi dəyərlərin həqiqi təəssübkeşi Azərbaycan dövlətdir. Ölkəmizdə Peyğəmbər (s) və Əhli-Beyt irsinin yaşadılmasının və mühafizə olunmasının əsl təminatçısı isə Qarabağın Fatehi, Müzəffər Ali Baş Komandan İlham Əliyevin özüdür. Bizlər üçün Azərbaycanın dövlət və milli maraqlarını müdafiə etmək iman məsələsidir!

Azərbaycan Əhli-Beyt mənsubları olaraq, müsəlman ölkəsi olan İrandan qətiyyətlə tələb edirik ki, təcavüzkar Ermənistana verdiyi bütün dəstəyi mütləq şəkildə dayandırsın və Azərbaycanla qonşuluq münasibətlərinə zərər vuran addımlardan dərhal geri çəkilsin.

Unutmasınlar ki, müsəlman qardaşına qarşı edilən haqsızlıq Allah tərəfindən cavabsız qalmayacaq!”