2026-cı ilin yanvar-iyun aylarında Azərbaycanın xarici ticarət dövriyyəsi 24 milyard 661,3 milyon ABŞ dolları təşkil edib.
Azpost.info bildirir ki, Dövlət Gömrük Komitəsinin açıqladığı rəsmi statistikaya əsasən, hesabat dövründə ölkənin ixracı 16 milyard 320,2 milyon dollar, idxalı isə 8 milyard 341 milyon dollar olub.
Ötən ilin eyni dövrü ilə müqayisədə ixrac 26,7 faiz artıb, idxal isə 27,6 faiz azalıb. Nəticədə Azərbaycanın xarici ticarətində 7 milyard 979 milyon dollarlıq müsbət saldo yaranıb ki, bu da ötən ilin analoji dövrü ilə müqayisədə 5,9 dəfə çoxdur.
Ümumilikdə, ölkənin xarici ticarət dövriyyəsi illik müqayisədə 261 milyon dollar və ya 1,1 faiz artım göstərib.
Ən böyük ticarət tərəfdaşları
Rəsmi statistikaya görə, ilin ilk yarısında Azərbaycanın ən böyük xarici ticarət tərəfdaşı İtaliya olub. Bu ölkə ilə ticarət dövriyyəsi 6,24 milyard dollar təşkil edib. Bunun təxminən 6 milyard dolları Azərbaycanın xam neft ixracının payına düşür.
İkinci yerdə Böyük Britaniya qərarlaşıb. Bu ölkə ilə ticarət dövriyyəsi 3,62 milyard dollara çatıb və əvvəlki illə müqayisədə 5,5 dəfə artıb.
İlk üçlüyü isə 2,90 milyard dollarlıq ticarət dövriyyəsi ilə Türkiyə tamamlayır.
MDB ölkələri ilə ticarət azalıb
Yanvar-iyun aylarında Azərbaycanın MDB ölkələri ilə xarici ticarət dövriyyəsi 2 milyard 707,9 milyon dollar olub ki, bu da ötən ilin eyni dövrü ilə müqayisədə 30,3 faiz azdır.
Bu dövrdə MDB ölkələrinə ixrac – 1 milyard 14,1 milyon dollar (18,2 faiz artım), MDB-dən idxal – 1 milyard 693,8 milyon dollar (44 faiz azalma) təşkil edib.
Rusiya ilə ticarətdə geriləmə
Statistikaya əsasən, Azərbaycan ilə Rusiya arasında ticarət dövriyyəsi ilk altı ayda 1 milyard 728,3 milyon dollar olub. Bu göstərici ötən ilin müvafiq dövrü ilə müqayisədə 31,4 faiz və ya 791,9 milyon dollar azalıb.
Bu müddətdə Rusiyaya ixrac – 608,6 milyon dollar (3 faiz artım), Rusiyadan idxal – 1 milyard 119,7 milyon dollar (42 faiz azalma) təşkil edib.
Nəticədə Azərbaycanın Rusiya ilə ticarətində 511,2 milyon dollarlıq mənfi saldo yaranıb.
Bundan başqa, Rusiya Azərbaycanın əsas ticarət tərəfdaşları siyahısında beşinci yerə geriləyib. Hazırda ilk dördlükdə İtaliya, Böyük Britaniya, Türkiyə və Çin qərarlaşır.
Samir Abdulla
