“Hər yüz manatın 51 manatı ərzağa xərclənir, pul yığmaq olmur” –Deputatdan AÇIQLAMA

“Əhalinin ümumi xərcləmələrində ərzaq məhsullarının payı yüksək olaraq qalmaqdadır”.
Azpost.info bildirir ki, bu sözləri Milli Məclisin deputatı, iqtisadçı Vüqar Bayramov statistik göstəriciləri təhlil edərkən bildirib.
Onun sözlərinə görə, bu ilin ilk 4 ayında pərakəndə ticarət şəbəkəsində 17,0 milyard manatlıq mal satılıb. Həmin müddətdə ərzaq məhsullarının alınmasına 8 milyard 693 milyon manat xərclənib.
“Bu dövrdə alıcıların xərclədiyi vəsaitin 51,2 faizi ərzaq məhsullarının, 5,2 faizi içkilər və tütün məmulatlarının, 13,4 faizi toxuculuq məhsulları, geyim və ayaqqabılarına sərf edilib”-deyə deputat vurğulayıb.
Pulun  5,8 faizi avtomobil benzini və dizel yanacağına ödənilib.  4,4 faizi elektrik malları və mebellərin, 2,4 faizi əczaçılıq məhsulları və tibbi ləvazimatların, 1,3 faizi kompüterlər, telekommunikasiya avadanlıqları və çap məhsullarının, 16,3 faizi isə digər qeyri-ərzaq mallarının alınmasına sərf olunub.
Göründüyü kimi, ümumi xərcləmədə ərzaq məhsullarının payı yüksək olaraq qalmaqdadır. Bu o deməkdir ki, vətəndaşlar xərclədikləri hər 100 manatın 51 manatını, yəni yarıdan çoxunu ərzağın alınmasına yönəldiblər. İnkişaf etmiş ölkələrdə ümumi istehlakın ¼-i ərzaq məhsullarının alınmasına yönəldilir”-deyə V.Bayramov qeyd edib.
V.Bayramovun fikrincə, ərzaq məhsullarına daha çox pulun xərclənməsi ənənəvi tələblə bağlı olsa da, son 2 ildəki inflyasiya səviyyəsi də təsrsiz deyil. “İstənilən məhsul üzrə xərcləmələrdə tələb ilə yanaşı, istehlak bazarındakı qiymət səviyyəsi də əsas faktorlardandır. Ərzaq məhsullarının daha çox xərc payına malik olması yığım imkanlarını da məhdudlaşdırır”.
Azpost.info
Əvvəlki məqalə

Türk dünyası qlobal gücə çevrilməyə hazırdır

Sonrakı məqalə

Baş prokuror İmişlidə itkin düşmüş 11 yaşlı uşaqla bağlı göstəriş verib