Ermənistan-Türkiyə sərhədində yerləşən Marqara keçid məntəqəsi tezliklə açılacaq.
AzPost bildirir ki, bu barədə “News.am” xəbər portalına diplomatik mənbə məlumat verib.
Məlumata görə, keçid məntəqəsinin açılışı martın 1-də olacağı gözlənilir.
Nəzarət-buraxılış məntəqəsinin Ermənistan Respublikasının Milli Təhlükəsizlik Xidmətinin qüvvələri tərəfindən mühafizə olunması planlaşdırılır.
Ermənistan Xarici İşlər Nazirliyinin mətbuat katibi Ani Badalyan bildirib ki, hazırda Ermənistan və Türkiyə arasında sərhəd-keçid məntəqəsinin açılması ilə bağlı heç bir dəyişiklik yoxdur.
Xatırladaq ki, bir neçə gün öncə Ermənistanın baş naziri Nikol Paşinyan Yerevan və Ankara arasında təmaslara maneələrin olmadığını vurğulayaraq Türkiyə ilə fəal və davamlı dialoq olduğunu elan edib.
Paşinyan ikitərəfli münasibətlərdə “nüansların” olduğunu etiraf etməklə yanaşı, müəyyən yekun addımlar vasitəsilə “real nəticələrin” tez əldə olunacağına ümid etdiyini bildirib. O əlavə edib ki, Ermənistan və Türkiyə heç vaxt indiki kimi intensiv dialoqda olmayıb.
Xatırladaq ki, ortaq sərhəd olmasına baxmayaraq, Türkiyə ilə Ermənistan arasında diplomatik əlaqələr yoxdur. 2009-cu ildə Sürixdə diplomatik münasibətlərin qurulması və münasibətlərin prinsipləri haqqında protokollar imzalanıb, lakin onlar hər iki tərəf tərəfindən ratifikasiya olunmayıb. İrəvan 2018-ci il martın 1-də bu protokolların ləğvini elan edib.
