Kredit
Azərbaycanda həqiqi hərbi xidmətə çağırılan vətəndaşların kredit borclarının avtomatik dondurulması ilə bağlı mövcud qanunvericilikdə birbaşa müddəa yoxdur. Lakin bəzi hallarda vətəndaşlar bu məsələni fərdi qaydada həll edə bilərlər.
AzPost-un araşdırmasına görə, “Hərbi vəzifə və hərbi xidmət haqqında” Qanuna əsasən, çağırışçı və ya hərbi xidmətə gedən şəxsin mülki hüquq münasibətlərindəki öhdəlikləri saxlanılır. Yəni kredit borcu olduğu halda ödənişin dayandırılması və ya güzəşt edilməsi üçün ayrıca prosedur tələb olunur.
Ekspertlər hesab edir ki, hərbi xidmətə çağırılan şəxs bankla razılaşma əldə edərək, kredit ödənişlərini xidmət müddətinə qədər dondura və ya təxirə sala bilər. Bunun üçün vətəndaş çağırış vərəqəsi və ya xidmətə qəbul arayışı ilə bankın müvafiq filialına müraciət etməlidir. Bank bu müraciəti fərdi qaydada qiymətləndirir və qərar verir.
Hüquqşünasların sözlərinə görə, əgər bank ödənişlərin dondurulmasına razılıq verməzsə, vətəndaş məhkəməyə müraciət edərək kredit öhdəliyinin icrasının hərbi xidmət bitənədək təxirə salınmasını tələb edə bilər. Bu, Mülki Məcəllənin 422-ci maddəsinə əsaslanaraq həyata keçirilir.
Bundan əlavə, əgər kredit öhdəliyinə görə artıq icra işi açılıbsa, borclu məhkəmə icraçılarına müraciət edərək icra hərəkətlərinin müvəqqəti dayandırılmasını tələb edə bilər. Bu hal “İcra haqqında” Qanunun 33-cü maddəsində öz əksini tapıb.
Xatırladaq ki, hazırda ölkədə kredit borcu olan çağırışçılar üçün ödənişlərin avtomatik dayandırılması tətbiq edilmir və bu məsələ yalnız bank və ya məhkəmə qərarı ilə mümkün olur.
