Heydər Əliyev qətlə yetirilmiş DİN nazirinin dəfnində -

Heydər Əliyev qətlə yetirilmiş DİN nazirinin dəfnində

İnternetdə Azərbaycan SSR-in sabiq daxili işlər naziri olmuş Arif Heydərovun dəfni ilə bağlı nadir görüntülər yayımlanıb.

AzPost bildirir ki, o, 1978-ci ilin iyununda kabinetində qətlə yetirilib.

Görüntülərdə vida mərasimində iştirak etmiş o zaman Azərbaycana rəhbərlik edən mərhum Heydər Əliyevin fəxri qaravulda durduğu görünür.

H.Əliyev həmçinin tabutu götürərək vidalaşır.

Azərbaycan dövlət xadimi Arif Heydərov 1970-1978-ci illərdə Azərbaycan SSR daxili işlər naziri olub. daxili xidmət general-leytenantıdır.

Arif Nəzər oğlu Heydərov 1926-cı ilin 28 iyununda Ağdaş şəhərində dünyaya gəlib. Əslən Qubadlı rayonunun Gürcülü kəndindəndir. Bakı Dövlət Universitetinin tarix fakültəsini bitirib. Əmək fəaliyyətinə 1942-ci ildə başlayıb, Əzizbəyov Neft Trestində çilingər işləyib. 1943-cü ildə Moskvaya xüsusi təhsil məktəbinə oxumağa göndərilib. 1944–1945-ci illərdə İkinci Dünya müharibəsinin iştirakçısı olub, Berlinə hücum əməliyyatında iştirak edib. 1945–1947-ci illərdə Polşada və Almaniyada müttəfiqlərin qoşunlarının heyətində xidmət keçib. 1949–1970-ci illərdə Azərbaycan Dövlət Təhlükəsizlik Komitəsinin kəşfiyyat şöbəsində işləyib.

Bu dövrdə operativ tapşırıqlarla əlaqədar dəfələrlə xarici ölkələrə gedib və uzun müddət Almaniya Demokratik Respublikasında və Türkiyədə daimi işdə çalışıb. 1967–1970-ci illərdə Türkiyədə konsul, 1970–1978-ci illərdə Azərbaycan SSR daxili işlər naziri işləyib. Azərbaycan SSR Ali Sovetinin deputatı idi.

Arif Heydərov 1978-ci il 29 iyunda iş yerində qətlə yetirilib. Qatil Şuşa həbsxanasının təsərrüfat hissəsinin rəisi kapitan Ziya Muradov 29 iyunda Bakıya gələrək, mülki geyimdə Daxili İşlər Nazirliyinin binasına daxil olur. Nazirin qəbul otağına gələrək, nazirin böyük referenti podpolkovnik Səfixanovu Makarov tipli tapanca ilə öldürür və otağa daxil olaraq nazir Arif Heydərovu və onun müavini general Salahəddin Kazımovu qətlə yetirir. Daha sonra Z. Muradov özünü öldürür. Qəzetlərə qətl xəbəri “xidməti vəzifəsini yerinə yetirərkən faciəli surətdə həlak olmuşdur” ifadəsi ilə çıxıb.

Alman, ingilis, türk, fars dillərini bilirdi. SSRİ-nin “Qırmızı Bayraq”, “Şərəf nişanı” ordenləri və bir çox sovet və xarici ölkə medalları ilə təltif olunmuşdu.

Arif Heydərov Fəxri Xiyabanda dəfn olunub.

Adına Bakıda tanker, küçə,məktəb vardır. DİN hospitalı Arif Heydərovun adını daşıyır.