Moskvadakı Reabilitasiya Mərkəzinin həkimi, reabilitasiya və fiziki tibb üzrə mütəxəssis Vladimir Ryabov təkbaşına idmanla məşğul olmağın ciddi risklər doğura biləcəyi barədə xəbərdarlıq edib. AzPost xəbər verir ki, bu barədə o, RIAMOya müsahibəsində danışıb.
Ryabovun sözlərinə görə, idman fəaliyyətinə peşəkar nəzarət olmadan başlamaq əzələ dartınmaları, oynaq çıxıqları, sınıqlar və duruş pozğunluqları ilə nəticələnə bilər. O qeyd edib ki, səhv şəkildə yerinə yetirilən hərəkətlər uzunmüddətli bərpa prosesinə səbəb olan zədələrə yol açır.
“Təcrübəmdə tez-tez bel, boyun, kürək ağrılarından əziyyət çəkən, duruş problemi və xroniki ağrılarla müraciət edən insanlara rast gəlirəm. Səbəbi isə əksər hallarda düzgün qurulmamış və ya nəzarətsiz fiziki yüklənmələrdir,” – deyə həkim bildirib.
Həkim əlavə edib ki, bir çox insanlar idman hərəkətlərini videolardan və ya məqalələrdən öyrənməyə çalışırlar. Lakin ən kiçik texniki səhvlər belə zamanla dayaq-hərəkət sistemində problemlərə səbəb ola bilər. Üstəlik, bu cür məşqlər çox zaman gözlənilən nəticəni vermir.
Ryabov vurğulayıb ki, düzgün qurulmamış məşq planı zamanı əzələ inkişafı balanssız gedir və bu, həm motivasiyanın itməsi, həm də fiziki formanın zəifləməsi ilə nəticələnə bilər.
