Türkiyə millisi qrupda qaldı –AVRO-2020

Futbol üzrə Avropa çempionatının A qrupunda mübarizəyə yekun vurulub.

III turun hər iki oyunu Bakı vaxtı ilə saat 20:00-da başlayıb.

Türkiyə millisi Bakı Olimpiya Stadionunda İsveçrə yığması ilə qarşılaşıb. Görüş “ay-ulduzlular”ın 1:3 hesablı məğlubiyyəti ilə başa çatıb.

Oyuna yaxşı başlayan türklər 4-cü dəqiqədə qola yaxın olublar. Lakin Kaan Ayhanın qüvvətli zərbəsini isveçrəli qapıçı Yan Zommer çətinliklə də olsa, dəf edə bilib. 2 dəqiqə sonra isə isveçrəlilər hesabı açıblar. Haris Seferoviç dəqiq zərbə ilə komandasını önə çıxarıb. 15-ci dəqiqədə Ozan Tufan uzaq məsafədən qapını nişan alsa da, Zommer bu dəfə də inamlı oynayıb. 26-cı dəqiqədə Türkiyə millisi 2-ci topu buraxıb. Bu dəfə Cerdan Şakiri uzaq məsafədən baxımlı qola imza atıb. Az sonra Şakiri türkiyəli qapıçı Uğurcan Çakırla üzbəüz qalsa da, bu dəfə qolkiper onun dubl etməsinə mane olub. İlk hissənin sonlarına doğru “ay-ulduzlular”ın heyətində sol cinah müdafiəçisi Mert Müldür 2 dəfə diqqət mərkəzinə düşüb. İtaliyanın “Sassuolo” klubunda oynayan futbolçu əvvəlcə cərimə meydançasının kənarından qüvvətli zərbə ilə bəxtini sınayıb. Lakin qolkiper yenə qapısını toxunulmaz saxlayıb. Müldür 43-cü dəqiqədə daha əlverişli vəziyyət yaxalasa da, yenə Zommer səddinə “ilişib”. Beləliklə, “ay-ulduzlular” fasiləyə 2 top fərqi ilə geridə yollanıblar.

İkinci hissəyə daha fəal başlayan tərəf isə İsveçrə yığması olub. Vladimir Petkoviçin başçılıq etdiyi komanda əvvəlcə Bril Embolo, ardınca isə Şakirinin ifasında rəqib qapısı qarşısında təhlükə yaradıb. Lakin hər iki epizodda top qapının üstündən keçib. 60-cı dəqiqədə Seferoviç bir neçə müdafiəçini geridə qoyub zərbə endirsə də, Çakır son anda topun qapıya getməsinə imkan verməyib. 62-ci dəqiqədə Türkiyə yığması fərqi minimuma endirib. İrfan Can Kahveci uzaq məsafədən qüvvətli zərbə ilə komandasının həm bu oyundakı, həm də turnirdəki yeganə qolunun müəllifi olub. Lakin türklərin sevinci cəmi 6 dəqiqə çəkib. Sürətli əks-hücuma çıxan İsveçrə yığması Şakirinin qolu ilə fərqi yenidən 2 topa çatdırıb. 77-ci dəqiqədə Qranit Cakanın cərimə zərbəsindən vurduğu top qapı dirəyindən geri dönüb. Az sonra Cengiz Ünderin zərbəsində azacıq dəqiqlik çatmayıb. Qarşılaşmada başqa qol olmayıb və Türkiyə millisi Avropa çempionatı ilə xalsız vidalaşıb.

Bu qrupun digər oyununda isə 1/8 finala vəsiqəni ötən tur təmin etmiş İtaliya millisi Uels yığmasını sınağa çəkib. Romadakı “Olimpiko“ stadionunda keçirilən görüş meydan sahiblərinin 1:0 hesablı qələbəsi ilə yekunlaşıb. Yeganə qolu 39-cu dəqiqədə Matteo Pessina vurub. İsveçrə ilə xallar bərabər olsa da, daha az qol buraxan britaniyalılar pley-offa adlayıblar. İsveçrəlilər isə son turun digər oyunlarının nəticəsindən asılı olaraq, ən yaxşı qrup 3-cüsü kimi 1/8 finala yüksələ bilərlər.

 

 

**

İsveçrə 2-0 hesabı ilə qalib gəlir.

**

İsveçrə hesabı açıb. 1-0.

**

A qrupunda yer alan Türkiyə millisi Bakı Olimpiya Stadionunda İsveçrə ilə qarşılaşır. Sloveniyalı Slavko Vinçiçin start fiti ilə qarşılaşma başlayıb.

İlk iki görüşdə məğlub olan “ay-ulduzlular” növbəti mərhələ şansını davam etdirmək üçün mütləq qələbə qazanmalıdır.

Matçı FİFA-nın prezidenti Gianni İnfantino və UEFA-nın baş katibi Teodor Teodoridis stadiondan izləyir.

Qeyd edək ki, qrupun digər oyununda İtaliya ilə Uels komandaları Romada üz-üzə gəlir.

**

İsveçrə və Türkiyə yığmaları arasında Bakı Olimpiya Stadionunda keçiriləcək “Avro-2020”nin A qrupunun III tur matçı üçün start heyətləri açıqlanıb.

Türkiyə millisinin start “11-də” meydana Uğurcan Çakır, Zeki Çelik, Merih Demiral, Çağlar Söyüncü, Ozan Tufan, Cengiz Ünder, Hakan Çalhanoğlu, 17. Burak Yılmaz, İrfan Can Kahveci, Kaan Ayhan və Mert Müldür çıxacaqlar.

İsveçrə seçməsinin start heyətində isə Yan Zommer, Silvan Vidmer, Niko Elvedi, Manuel Akanci, Bril Embolo, Remo Froyler, Haris Seferoviç, Qranik Caka, Rikardo Rodriges, Stiven Tsuber və Cerdan Şakiri yer alıblar.

Qeyd edək ki, Bakı Olimpiya Stadionundakı qarşılaşma saat 20:00-da başlayacaq.

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Əvvəlki məqalə

Ermənistanda parlament seçkilərində səsvermə başa çatıb

Sonrakı məqalə

Ermənistan MSK ilkin nəticələri açıqlayıb