Kərə yağı istehsalı idxalı 42 faiz üstələyib

2024-cü ilin yanvar-fevral aylarında Azərbaycana 15,6 milyon dollar dəyərində 2968 ton kərə yağı idxal edilib.

“APA-Economics”in Dövlət Gömrük Komitəsinin hesabatı əsasında apardığı hesablamalara görə, bu göstərici ötən ilin müvafiq dövrü ilə müqayisədə dəyər baxımından 49.6% və ya 5.2 milyon dollar, həcm baxımından isə 68% və ya 1 206 ton artıb. Belə ki, 2023-cü ilin ilk 2 ayında Azərbaycana 10.4 milyon dollar dəyərində 1762 ton kərə yağı və süddən hazırlanmış digər yağlar idxal edilib.

Xatırladaq ki, hesabat dövründə kərə yağı və süddən hazırlanmış digər yağların ümumi idxalda payı 0.64% təşkil edib.

Dövlət Statistika Komitəsinin hesabatına əsasən isə bu ilin yanvar-fevral aylarında ölkədə 4225 ton kərə yağı istehsal edilib. Bu göstərici ötən ilin müvafiq dövrü ilə müqayisədə 3.5% azdır. Beləliklə hesabat dövründə Azərbaycanda kərə yağı istehsalı idxaldan 42.4% çox olub.

Qeyd edək ki, bu dövrdə Azərbaycanda idxal kərə yağının orta satış qiyməti 19.57 manat, yerli kərə yağının isə orta satış qiyməti 18.98 manat təşkil edib.

Əvvəlki məqalə

Dövlət Xidməti sahibkarlıq subyektlərinə müraciət etdi

Sonrakı məqalə

Cinayət törətməkdə şübhəli bilinən 35 nəfər saxlanılıb