Məşhur “Kiss” musiqi qrupunun keçmiş gitaraçısı, rok musiqisinin tanınmış simalarından biri olan Eys Freyli 74 yaşında dünyasını dəyişib. AzPost xəbər verir ki, sənətçi ötən ay aldığı xəsarətlərin nəticəsində həyatını itirib.
Məlumata görə, Freyli ötən ay öz musiqi studiyasında yıxılıb və nəticədə beynində qanaxma yaranıb. Həkimlərin səylərinə baxmayaraq, onun vəziyyəti günbəgün pisləşib. Bu hadisədən sonra nəzərdə tutulan konsert səfəri də təxirə salınmışdı.
Mərhum musiqiçinin ailəsi bildirib ki, bu itki onlar üçün son dərəcə ağır olub. Ailəsi Freylinin son günlərini yaxınlarının duası və dəstəyi ilə keçirdiyini vurğulayıb.
Eys Freyli “Kiss” qrupunun əsas üzvlərindən biri kimi dünya musiqi tarixində özünəməxsus iz qoyub. O, 1970–1980-ci illərdə səhnədəki enerjisi və fərqli ifa tərzi ilə tanınıb. Onun ifasında səslənən “Shock Me” və “New York Groove” kimi mahnılar bu gün də rok janrının sevilən əsərlərindəndir.
Musiqi mütəxəssisləri hesab edirlər ki, Freyli həm “Kiss” qrupunun uğuruna, həm də ümumilikdə rok musiqisinin inkişafına böyük töhfə verib. O, öz ifa tərzi ilə sonrakı nəsil musiqiçilərə ilham qaynağı olub.
