Honduras prezidenti Xiomara Kastronun helikopteri cəngəllikdə məcburi eniş edib. AzPost xəbər verir ki, bu barədə El Heraldo məlumat yayıb.
Bütün sərnişinlər və ekipaj üzvləri təhlükəsiz şəkildə çıxıb və xəsarət almayıb. Təcili enişə qatı duman səbəb olub.
Nəşrin dərc etdiyi videogörüntülərdə helikopterin cəngəlliyin ortasındakı boşluğa eniş etdiyi görünür. Bundan əlavə, respublika Prezidentinin hadisə yerinə gələn yerli KİV nümayəndələri ilə ünsiyyətdə olmasının fotoşəkilləri təqdim olunur.
Enişdən sonra Kastro yerli sakinlərlə görüşüb.
O, 27 yanvar 2022-ci ildən Honduras prezidentidir və eyni zamanda devrilmiş keçmiş prezident Manuel Zelayanın həyat yoldaşıdır. Hondurasda 2009-cu ildə dövlət çevrilişinə qarşı müqavimət hərəkatının lideri olub. O, 2013 və 2017-ci illərdə Azadlıq və Yenidənqurma Partiyasını təmsil edərək prezidentliyə namizəd olub. 2021-ci ilin noyabrında keçirilən prezident seçkilərində qalib gəlib.
