Qərbi Azərbaycanın maddi-mədəni abidələri ilə bağlı elektron baza yaradılır

“İnformasiya və Sosial Təşəbbüslərə Dəstək” İctimai Birliyi Qərbi Azərbaycanın maddi-mədəni abidələri ilə bağlı elektron baza yaradır. Bu elektron baza  Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə icra olunan “Qərbi Azərbaycanla bağlı informasiya mübarizəsi” layihəsi çərçivəsində hazırlanır.

İctimai Birliyin sədri və layihənin rəhbəri Cəsarət Hüseynzadə bildirib ki, Qərbi Azərbaycanın irsi mövzusu Qərbi Azərbaycanla bağlı həyata keçirilən fəaliyyətlərdə xüsusi önəm daşıyır. “Qərbi Azərbaycanda azərbaycanlılara məxsus maddi-mədəni irs nümunələri ermənilər tərəfindən dağıdılmış və ya saxtalaşdırılmışdır. Toponimlərin dəyişdirilməsi və azərbaycanlılara məxsus abidələrin erməniləşdirilməsi bu siyasətin bir hissəsi olmuşdur. Bu baxımdan Qərbi Azərbaycanın tarixi irsi ilə bağlı həqiqətlərin dünya ictimaiyyətinə çatdırılması üçün daha çox resursların yaradılmasına ehtiyac var.”

C. Hüseynzadə qeyd edib ki, bu tipli elektron baza ilk dəfədir yaradılır: “Bu elektron bazaya maddi-mədəni abidələrlə bağlı məlumatlar azərbaycan və ingilis dillərində toplanılacaq. E-bazada müxtəlif kriteriyalar üzrə axtarış sistemi qurulacaqdır. İlkin mərhələdə 200 maddi-mədəni abidə haqqında məlumatlar işlənilib bazaya daxil edilməsi nəzərdə tutulur”.

Əvvəlki məqalə

Prezident Gürcüstandakı səfirimizə “birinci dərəcəli elçi” rütbəsi verdi

Sonrakı məqalə

Makron Baş nazirin istefasını qəbul etməyib