Çinli alimlər Parkinson xəstəliyinin erkən mərhələdə müəyyən olunması üçün qeyri-adi və sadə bir metod aşkarlayıblar.
AzPost xəbər verir ki, tədqiqatın nəticələri nüfuzlu Analytical Chemistry jurnalında dərc olunub və bu yanaşma xəstəliyin ilkin əlamətləri görünməzdən əvvəl diaqnoz qoymağa imkan verə bilər.
Qeyd olunur ki, Parkinson xəstəliyi beyin hüceyrələrinin tədricən məhv olması ilə xarakterizə olunan neyrodegenerativ bir pozğunluqdur. Hazırda bu xəstəliyin müalicəsi mümkün olmasa da, erkən diaqnoz xəstəliyin gedişatını yavaşlatmaq və həyat keyfiyyətini artırmaq baxımından olduqca əhəmiyyətlidir. Lakin mövcud diaqnostik üsullar – neyroimaging, genetik analizlər və klinik müayinələr – həm bahalı, həm də bəzən qeyri-dəqiqdir.
Məhz bu çətinliyi nəzərə alan tədqiqatçılar yeni və əlçatan bir həll axtararaq qulaq kirinin tərkibindəki uçucu üzvi birləşmələrin (VOC) profilini süni intellektlə analiz ediblər. Bu birləşmələr bədənin metabolik və iltihabi vəziyyətinə dair ipucları verir və özünəməxsus qoxuya malikdir.
Alimlər bildirirlər ki, qulaq kirinin seçilməsi təsadüfi deyil – bu bioloji maddə xarici mühitdən nisbətən təcrid olunduğundan, onun tərkibindəki VOC-lar daha sabit və etibarlı məlumat mənbəyi hesab olunur. Müqayisə üçün, daha əvvəl dəri tərəfindən ifraz olunan sebum nümunələri üzərində aparılan testlər müəyyən nəticələr versə də, ətraf mühit təsirlərinə həssas olduğu üçün diaqnostik baxımdan etibarsız ola bilərdi.
