Telefon uşaq
Telefon və planşet ekranlarının gecə saatlarında istifadəsi insan sağlamlığı üçün ciddi risklər yaradır. AzPost bildirir ki, bu barədə Almaniyanın Bonn Universitetinin nevroloqu Tomas Becker Deutsche Welle-yə danışıb. Mütəxəssisin sözlərinə görə, telefon ekranlarının yaydığı mavi işıq melatonin hormonunun istehsalını azaldır. Bu isə orqanizmin yuxuya getmə prosesini çətinləşdirir və yuxunun keyfiyyətinə mənfi təsir edir.
Becker qeyd edib ki, xüsusilə gecə saatlarında smartfon istifadəsi beyində gərginlik və diqqət dağınıqlığı yaradır. O bildirib ki, yatmazdan əvvəl telefondan istifadə edən insanların yuxuya getmə müddəti 30-40 dəqiqə uzanır. Nevropatoloq vurğulayıb ki, mavi işıq həmçinin baş ağrısı və depressiya hallarını artırır.
Mütəxəssis tövsiyə edir ki, gecə rejimində ekran parlaqlığı minimuma endirilməli və ya “gecə rejimi” aktiv edilməlidir. Bundan əlavə, yuxuya getməzdən ən azı 1 saat əvvəl telefon, planşet və kompüterdən istifadə dayandırılmalıdır. Alternativ olaraq kitab oxumaq və ya sakit musiqi dinləmək məsləhət görülür.
Becker həmçinin qeyd edib ki, uşaqların yuxu saatlarında telefondan istifadə etməsi onların psixoloji və fiziki inkişafını mənfi təsir edə bilər.
