Xoruldama
Xoruldama təkcə narahatedici bir vərdiş deyil, həm də sağlamlıqla bağlı ciddi problemlərin əlaməti ola bilər. AzPost xəbər verir ki, endokrinoloq Zuxra Pavlova bu problemi aradan qaldırmaq üçün beş effektiv üsul təklif edib.
Mütəxəssis ilk olaraq dil əzələlərinin gücləndirilməsini məsləhət görür. Onun sözlərinə görə, zəif dil əzələləri nəfəs yollarını bağlaya bilər. Sadə məşqlər – dili damağa basmaq, bir neçə saniyə saxlamaq və ya dili müxtəlif istiqamətlərdə hərəkət etdirmək – bu əzələləri aktivləşdirir.
İkinci üsul farenks və damaq əzələlərinin möhkəmləndirilməsidir. Bu məqsədlə tez-tez oxumaq, xüsusilə “la” və “ka” səslərini səsləndirmək, şar üfürmək və çeynəmə hərəkətlərini təqlid etmək faydalı hesab olunur.
Üçüncü tövsiyə burunun şoran məhlulu ilə yuyulmasıdır. Bu, allergenləri və toplanan seliyi təmizləyərək nəfəs almağı asanlaşdırır. Dördüncü metod isə yan üstə yatmaqdır. Arxası üstə yatan şəxslərdə xoruldama riski artır, yan üstə uzanmaq isə hava yollarının açıq qalmasına kömək edir.
Beşinci və sonuncu vasitə burun dilatorlarından istifadədir. Bu sadə cihazlar hava axınını yaxşılaşdırır və xoruldamanın intensivliyini azaldır.
Həkim əlavə edib ki, bu üsulların birləşdirilməsi yuxu keyfiyyətini xeyli yüksəldə bilər və xoruldama ilə bağlı narahatlıqları minimuma endirər.
