Murad Ülkeri
“Forbes Türkiyə” jurnalı dörd illik fasilədən sonra “Ən zəngin 100 türk” siyahısını yenidən dərc edib.
Valyuta.az xəbər verir ki, maraqla gözlənilən siyahıda ümumi sərvəti 128,5 milyard dollar olan 108 nəfər yer alıb.
“Forbes Türkiyə” 4 illik fasilədən sonra dərc etdiyi siyahıda uzun müddətdir birinciliyi qoruyan Murad Ülkeri 5,5 milyard dollarlıq sərvətlə yenidən zirvədə göstərib. Ülkəri COVID-19 dövründə hazırladığı vaksinlə tanınan və “BioNTech” şirkətinin sahibi olan Uğur Şahin izləyib. Şahinin sərvəti 4,8 milyard dollar olaraq açıqlanıb. Üçüncü pillədə 4,3 milyard dollarla Cəmil Kazancı yer alıb. Onu 4 milyard dollarla Eren Özmen və 3,8 milyard dollarla Fatih Özmen izləyib.
Siyahının diqqət çəkən məqamlarından biri də 45 yaşdan aşağı milyarderlərin sayının artması olub. Siyahıya 7 nəfər bu yaş qrupu üzrə daxil olub. Onlardan üçü “Koç” ailəsinin üzvləri – İpək Kıraç (40), Aylin Elif Koç (24) və Esra Çiğdem Koç (28) olub. “Yıldız Holding” ailəsindən Ahmət Özokur (44) və “Esas Holding” ailəsindən Kazım Köseoğlu (42) da siyahıda yer alan digər gənc adlardandır.
Bu adların əksəriyyəti ailələrinin qurduğu şirkətlərin varisləri olsa da, öz sərvətini özü qazananların sayı 59 nəfər olaraq göstərilib. Öz sərvətini yaradan 45 yaş altı iki şəxs isə xüsusilə fərqlənib: “Baykar Texnologiya” İdarə Heyətinin üzvü Selçuk Bayraktar (45) və “Nef” şirkətinin rəhbəri Erden Timur (42).
Siyahıda 24-cü pillədə yer alan və “Baykar”ın digər ortağı olan Haluk Bayraktar (46) isə bu yaş qrupu üzrə sərvətini özü yaradan ən yaxın adlardan biri olub.
Gələcək illərdə öz təşəbbüsləri ilə sərvət qazanan gənclərin bu siyahıya daha çox daxil olacağı proqnozlaşdırılır.
