“Yuxu, uşağın inkişafının əsas elementidir. Kifayət qədər yatmamaq, uşağın sağlamlığına, ailə, yaşıdlar və müəllimlərlə münasibətlərinə, gündəlik fəaliyyətlərinə və davranışlarına təsir edir”.
Qaynarinfo “CNN Türk”ə istinadən xəbər verir ki, bunu Uşaq Sağlamlığı və Xəstəlikləri üzrə mütəxəssis Dr. Pelin Aytaç Uras deyib.
Həkim erkən uşaqlıq dövründə beynin əsas fəaliyyətinin yuxu olduğunu bildirib. O, körpəlik dövründə yuxu problemləri haqqında məlumat verib. Pelin Aytaç Uras qeyd edib ki, uşaqların yuxusunun böyük hissəsi REM (sürətli göz hərəkəti) yuxusundan ibarətdir:
“REM və Non-REM (sürətli göz hərəkəti olmayan) yuxuları gecə boyunca dövri olaraq bir-birini əvəz edir. Bu dövr körpəlikdə 50-60 dəqiqə davam etdiyi halda, uşaqlıq və yetkinlik dövründə 90 dəqiqəyə qədər uzanır”.
Uşaqlarda sağlam yuxu vərdişlərinin formalaşmasının vacibliyinə toxunan mütəxəssis qeud edib:
“Körpə və uşaqlar üçün yuxu rejimi formalaşdırılmalı və bu rejim sevgi ilə tətbiq olunmalıdır. Yatmaq vaxtı valideynlə uşaq arasında münaqişəyə səbəb olmamalıdır”.
Dr. Uras uşaqların hər gün açıq havada idmanla məşğul olmasının yuxu rejiminə müsbət təsir etdiyini vurğulasa da, yatmazdan əvvəlki 2-3 saat ərzində ağır fiziki məşqlərdən çəkinməyin vacibliyini bildirib:
“Uşaq otaqlarında zəif işıq verən gecə lampaları istifadə edilə bilər, lakin televizor olmamalıdır. Körpənizi ilk yuxu əlamətləri görünən kimi yatağına yerləşdirin. Ən ideal yanaşma, uşağın rahatlaşaraq təbii şəkildə yuxuya keçməsinə şərait yaratmaqdır. Bundan əlavə, yatarkən uşağın sevimli oyuncağını və ya ona aid xüsusi bir əşyanı yanında saxlamağına icazə vermək, yuxuya getməsini asanlaşdıra bilər”.
Uşaqların rahat yatması üçün otaq temperaturunun tənzimlənməsinin və pambıq parçadan hazırlanmış geyimlər geyinmələrinin vacib olduğunu bildirən Dr. Uras yuxuya getməkdə çətinlik və gecə tez-tez oyanma hallarının uşaqlarda geniş yayıldığını vurğulayıb:
“Yatağa özbaşına yerləşmək və yuxuya getmək uşaqların öyrəndiyi davranışlardır. Əgər uşaq yuxuya getmək üçün anasının köməyinə və ya müəyyən bir vərdişə (məsələn, oyuncaqlarla oynamaq, musiqi dinləmək) öyrəşibsə, gecə yuxusu zamanı təbii oyanmalar zamanı da həmin şəraiti tələb edəcək. Belə hallarda, valideynlər uşağın yuxuya yenidən keçməsinə kömək etməlidirlər”.
Yuxunun uşaqların həm fiziki, həm də psixoloji sağlamlığı üçün son dərəcə vacib olduğunu vurğulayan Dr. Uras, yuxu problemləri ilə üzləşən valideynlərin pediatr həkimə müraciət etməli olduqlarını bildirib.
