Rusiyada aparılan yeni psixoloji araşdırma universitet tələbələrinin motivasiya səviyyəsi ilə uşaqlıqda valideyn nəzarəti arasında əlaqəni ortaya qoyub.
AzPost xəbər verir ki, Lomonosov adına Moskva Dövlət Universitetinin alimləri hesab edirlər ki, valideynlərin uşaqlara qarşı hədsiz nəzarətçi davranışı onların sonrakı təhsil həyatında öyrənməyə marağını azalda bilər.
Tədqiqat çərçivəsində təxminən üç yüz tələbə arasında sorğu keçirilib. Nəticələrə görə, valideynlərini nəzarətçi kimi qiymətləndirən tələbələr daha az motivasiya ilə dərslərdə iştirak ediblər və ümumi qiymət göstəriciləri də aşağı olub. Bu isə psixoloqlar tərəfindən uşaqlıq dövründə sərt nəzarətin psixoloji təsiri kimi qiymətləndirilir.
Moskva Dövlət Universiteti açıqlamasında bildirib ki, öyrənməyə marağın azalması və akademik performansdakı zəiflik bu psixoloji nəzarətin nəticəsidir. Psixologiya fakültəsinin professoru Tamara Qordeeva qeyd edib ki, bu nəzarət forması günahkarlıq hissi və cəza qorxusu ilə uşağa təsir göstərməyə əsaslanır.
Ona görə də alimlər fiziki yox, psixoloji nəzarətin formalarını ayırd etməyin vacibliyini vurğulayırlar. Valideynlərin övladları ilə daha azad və etibarlı münasibət qurması gələcəkdə onların motivasiyasını və uğur potensialını artıran əsas faktorlardan biri hesab olunur.
Mütəxəssislər bu sahədə psixoloji maarifləndirmənin və erkən yaşlarda balanslı valideyn davranışının vacibliyini bir daha xatırladır.
