kofe
İsti havalarda bir çoxumuz susuzluğu yatırmaq üçün çay, kofe, qazlı içkilər və hətta spirtli içkilərə üz tuturuq. Lakin həkim-narkoloq Tatyana Klimenko bu içkilərin yayda istehlak edilməsinin sağlamlıq üçün təhlükəli olduğunu deyir. AzPost xəbər verir ki, onun sözlərinə görə, kofein tərkibli içkilər – məsələn, çay, kofe və kola – sidikqovucu təsirə malikdir və bu da orqanizmdə susuzluğun artmasına səbəb olur.
Klimenko qeyd edir ki, istidə sidikqovucu təsir bədənin su balansını pozur, bu isə ürək və böyrək sisteminə əlavə yük yaradır. Mütəxəssis əlavə edir ki, çox soyuq içkilər də təhlükəlidir, çünki damar spazmı və soyuqdəymə riski artır, bu isə qan dövranına və ürəyə mənfi təsir göstərə bilər.
Spirtli içkilər isə xüsusilə yay günlərində daha təhlükəlidir: alkoqol bədənin istilik tənzimlənməsini pozur və istivurma riskini artırır. Klimenko bu səbəbdən isti havalarda sərinləşdirici kimi yalnız otaq temperaturunda olan suyun kiçik porsiyalarda və tez-tez içilməsini tövsiyə edir. Hər 15-20 dəqiqədən bir bir neçə qurtum su içmək, bədəndə maye balansının qorunmasına kömək edir.
Mütəxəssis vurğulayır ki, isti hava şəraitində yalnız düzgün maye qəbulu deyil, həm də düzgün içki seçimi sağlamlığın qorunmasında mühüm rol oynayır. Yanlış içkilər susuzluq əvəzinə orqanizmdə stress və pozulmalara səbəb ola bilər.
