ABŞ- ın Missuri ştatında Patricia Williams insanların olduğu evi yandırmağa cəhd etdiyi üçün 12 il həbs cəzasına məhkum edilib. AzPost xəbər verir ki, bu barədə “The New York Post” yazır.
2023-cü ilin avqustunda Williams yanacaqdoldurma məntəqəsində yanacaq alarkən müşahidə kameralarına düşüb. Sonra soda şüşəsinə tökərək evə gəlib. Qadın od vurmaq üçün camaşırxananı seçib, oradakı paltarları yerə atıb və üzərinə qarğıdalı çipsləri töküb. Ardınca benzin səpərək yandırıb.
Həmin vaxt evdə daha üç nəfər olub. Onlar xəsarət almayıb və Williams haqqında polisə məlumat veriblər. Şahidlərin dediyinə görə, qadın saxlanılan zaman onun üzü hisə boyanıb. Dindirilmə zamanı Uilyams yanğını qəsdən törətdiyini etiraf edib. O, yağlı çipslərin tez alışacağını bildiyi üçün bu yolu seçib.
Məhkəmə zamanı məlum olub ki, polisin Williamsın başqa işlərlə bağlı həbsi üçün bir neçə orderi var. Yanvarın 7-də qadın həbs cəzasına məhkum edilib. Yanğın zamanı Uilyamsın evdəki insanlarla hansı əlaqəsi olduğu hələlik məlum deyil.
