İnternetdə yayılan məlumatlara görə, soyuq su içməyin daha çox kalori yandırdığı və arıqlamağa kömək etdiyi iddia olunur. Mütəxəssislər isə bu məlumatın müəyyən qədər doğru olsa da, şişirdildiyini bildirirlər.
AzPost “Health” jurnalına istinadla xəbər verir ki, dietoloq Brian Foster orqanizmin soyuq suyu bədən temperaturuna uyğunlaşdırmaq üçün müəyyən enerji sərf etdiyini bildirib. Onun sözlərinə görə, bu proses həqiqətən baş verir, lakin yandırılan kalori miqdarı olduqca azdır.
Ekspert qeyd edib ki, yalnız soyuq su hesabına arıqlamaq mümkün deyil. Çəkinin azalması üçün düzgün qidalanma və fiziki aktivlik əsas rol oynayır. Bununla yanaşı, kifayət qədər su içmək maddələr mübadiləsini dəstəkləyir və iştahanın nəzarətdə saxlanmasına kömək edir.
Araşdırmalarda göstərilir ki, yeməkdən əvvəl bir stəkan su qəbul edən insanlar daha az qida yeyə bilirlər. Lakin həddindən artıq soyuq su bəzi insanlarda boğaz və mədə narahatlığı yarada bilər.
Həkimlər suyun temperaturundan daha çox onun gündəlik normada qəbul edilməsinin vacib olduğunu vurğulayırlar.
