Dünya

MKİ rəhbəri Moskvaya nə üçün gəlib?- Kreml səbəbini açıqladı

26 Avqust 2026 - 09:34

Rusiya Prezidentinin mətbuat katibi Dmitri Peskov The Washington Post qəzetinə bildirib ki, ABŞ Mərkəzi Kəşfiyyat İdarəsinin (MKİ) direktoru Con Retkliffin çərşənbə axşamı Moskvaya səfəri iki ölkənin xüsusi xidmət orqanları arasında təmaslarla bağlı olub.

Peskovun sözlərinə görə, söhbət “xüsusi xidmət orqanları arasında təmaslardan” gedir. TASS bu barədə məlumat yayıb.

The Washington Post qeyd edir ki, Rusiya prezidentinin mətbuat katibi Retkliffin səfəri ilə bağlı başqa hər hansı detal açıqlamayıb.

Xatırladaq ki, MKİ-nin rəhbəri Con Retkliff müharibə başlayandan bəri ilk dəfə Moskvaya səfər edib. Sonuncu dəfə MKİ direktoru Rusiyanın paytaxtına 2021-ci ilin noyabrında getmişdi. Uilyam Börns sonradan xatırladıb ki, həmin vaxt Vladimir Putinlə Rusiyanın Ukraynaya müdaxilə planlarını müzakirə edib.

ABŞ-ın The Wall Street Journal qəzeti yazır ki, Retkliffin Moskvaya səfərinə səbəb ABŞ-ın topladığı kəşfiyyat məlumatları olub. Həmin məlumatların Rusiyanın səfərbərliyə hazırlaşdığını və Avropada “NATO-nun qətiyyətini sınamaq” planlarının olduğunu göstərdiyi bildirilir.

The Insider nəşrinin redaktoru Maykl Vays da hesab edir ki, MKİ direktoru Moskvaya Putini NATO-ya qarşı eskalasiyadan çəkindirmək üçün gedib.

ABŞ hakimiyyəti yüksəkvəzifəli nümayəndə heyətinin Rusiyaya səfəri barədə əvvəlcədən Ukraynanı məlumatlandırıb və həmin müddətdə Moskva, Sankt-Peterburq və Rusiyanın şimal bölgələrinə pilotsuz uçuş aparatları və raketlərlə zərbələr endirməməyi xahiş edib.

Bu barədə Financial Times qəzetinin Ukrayna üzrə baş müxbiri Kristofer Miller məlumat verib.

Onun sözlərinə görə, Kiyev bu xahişi yerinə yetirməyə razılaşıb. Millerin məlumatını Axios jurnalisti Barak Ravid və RBK-Ukrayna agentliyi də təsdiqləyib.

MKİ rəhbərinin Rusiyaya səfəri fonunda Moskva Birjasının indeksi kəskin yüksəlib. Artım liderləri arasında son günlər Ukrayna dronlarının hücumuna məruz qalan anbarları ilə tanınan onlayn marketplace Ozonun səhmləri, həmçinin “Lukoyl” şirkətinin səhmləri də olub. Bu barədə DW məlumat yayıb.