Avtomobilin yanacaq sərfiyyatının artması həmişə mühərrikdə ciddi nasazlıq olması demək deyil. Bəzən sürücünün gündəlik istifadə zamanı etdiyi sadə səhvlər avtomobilin daha çox yanacaq sərf etməsinə səbəb olur.
Ən çox rast gəlinən səbəblərdən biri təkərlərdə hava təzyiqinin düzgün olmamasıdır.
Təkərlərin havasını yoxlayın
Təkərdə hava təzyiqinin normadan aşağı olması yuvarlanma müqavimətini artırır. Nəticədə mühərrik avtomobili hərəkət etdirmək üçün daha çox enerji sərf edir.
Bu səbəbdən sürücülərə təkərlərin hava təzyiqini mütəmadi yoxlamaq və avtomobil istehsalçısının tövsiyə etdiyi göstəriciyə uyğun saxlamaq məsləhətdir.
Kondisioner də təsir edir
Xüsusilə isti havalarda kondisioner avtomobilin yanacaq sərfiyyatına təsir göstərə bilər. Lakin bundan daha böyük problem kondisionerin özünün istifadəsi deyil, avtomobilin texniki vəziyyətidir.
Çirkli hava filtri, mühərrikdə texniki problem və düzgün işləməyən sensorlar da sərfiyyatın artmasına səbəb ola bilər.
Kəskin sürətlənmələrdən uzaq durun
Qaz pedalına kəskin basmaq və tez-tez sərt əyləcləmək yanacaq sərfiyyatını artıran əsas sürücülük vərdişlərindəndir.
Sabit və proqnozlaşdırılan sürüş tərzi həm yanacağa qənaət etməyə, həm də avtomobilin bəzi hissələrinin daha az yüklənməsinə imkan verir.
Baqajdakı artıq yükə də diqqət edin
Avtomobildə uzun müddət daşınan və əslində ehtiyac olmayan ağır əşyalar da sərfiyyata təsir göstərə bilər.
Çəki artdıqca avtomobilin hərəkətə gətirilməsi üçün daha çox enerji tələb olunur. Buna görə baqajda istifadə olunmayan ağır əşyaları saxlamaq əvəzinə onları çıxarmaq daha məqsədəuyğundur.
Yanacaq birdən-birə çoxalmağa başlayıbsa…
Əgər sürücülük tərzi dəyişmədiyi halda avtomobil əvvəlkindən nəzərəçarpacaq dərəcədə çox yanacaq sərf etməyə başlayıbsa, məsələni yalnız sürücülük vərdişləri ilə izah etmək olmaz.
Təkərlərin vəziyyəti, hava filtri, əyləc sistemi, mühərrik və yanacaq sistemi yoxlanılmalıdır. Yanacaq sərfiyyatında davamlı və kəskin artım müşahidə edilirsə, avtomobili servisə göstərmək daha düzgün addımdır.
Bəzən bir neçə dəqiqəlik texniki yoxlama sürücünü gələcəkdə daha böyük xərcdən xilas edə bilər.
