Əllər sağlamlıq vəziyyəti haqqında çox şey deyə bilər. Barmaqlarda və ovuclarda yaranan müxtəlif hisslər və dəyişikliklər bəzən orqanizmin başqa nahiyələrindəki problemlərdən xəbər verir. Bu əlamətləri diqqətdən kənarda qoymaq olmaz. Çünki onlar müəyyən maddələrin çatışmazlığına və ya bəzi xəstəliklərin inkişafına işarə edə bilər.
Əllərin titrəməsi
Əllər nəzarətsiz şəkildə titrəməyə başlayırsa, dərhal panikaya düşmək lazım deyil. Bunun səbəbi həddindən artıq kofein qəbulu və ya bəzi dərmanların, məsələn, antidepressantların və astma preparatlarının yan təsiri ola bilər.
Lakin titrəmə heç bir aydın səbəb olmadan yaranır və tez-tez təkrarlanırsa, həkimə müraciət etmək məsləhətdir. Nadir hallarda bu, hərəkətlərə təsir edən nevroloji xəstəlik – Parkinson xəstəliyinin əlaməti ola bilər.
Kövrək və zəif dırnaqlar
Dırnaqların nazikləşməsi və asanlıqla sınması orqanizmdə sink çatışmazlığından xəbər verə bilər. Sink dəri hüceyrələrinin yenilənməsi üçün vacib elementlərdən biridir.
Bu halda qida rasionuna sinklə zəngin məhsullar – qoz-fındıq, yulaf, cücərdilmiş buğda dənələri və ət əlavə etmək tövsiyə olunur.
Əllərdə qan dövranı problemləri
Sağ əlin barmaqlarında keyimə sinirin sıxılması ilə əlaqəli ola bilər. Lakin bəzi hallarda bu əlamət ürək-damar sistemi ilə bağlı problemlərdən də xəbər verə bilər.
Keyimə təkrarlanırsa, səbəbini müəyyənləşdirmək üçün həkimə müraciət etmək daha doğrudur.
Dərinin qabıqlanması
Barmaq uclarının dərisi qəfil və güclü şəkildə qabıqlanmağa başlayıbsa, bunun mümkün səbəblərindən biri B qrupu vitaminlərinin, xüsusilə B3 (niasin) və B7 (biotin) vitaminlərinin çatışmazlığı ola bilər.
Bu maddələr dərinin sağlamlığının qorunmasında mühüm rol oynayır. Biotin dəri və dırnaqların böyüməsinə, niasin isə hüceyrələrin bərpasına kömək edir.
Rasiona avokado, tuna balığı, göbələk, yerfındığı və digər balıq məhsullarını əlavə etmək faydalı ola bilər.
Əllərdə quruluq, qaşınma və səpkilər
Adi nəmləndirici vasitələr dərinin quruluğunu aradan qaldırmırsa, səbəb ekzema ola bilər. Bu dəri xəstəliyi qaşınma, qızartı və qıcıqlanmaya səbəb olur.
Həkim dərinin bərpasına kömək edən xüsusi məlhəmlər təyin edə bilər. Ekzema olmadığı halda dəri yenə də həddindən artıq qurudursa, tərkibində A vitamini olan kremlərdən istifadə etmək və əlləri sərt kimyəvi vasitələrlə tez-tez yumaqdan çəkinmək olar.
Bundan əlavə, yatmazdan əvvəl dırnaq ətrafındakı dəriyə E vitamini çəkmək də dərinin vəziyyətini yaxşılaşdırmağa kömək edə bilər.
Barmaqların göyərməsi
Barmaq uclarının rəngi dəyişir, əvvəlcə ağarır, daha sonra göy və qırmızı rəng alırsa, bu, Reyno sindromunun əlaməti ola bilər.
Bu vəziyyət soyuqluq hissi, keyimə və iynələnmə ilə müşayiət olunur. Reyno sindromu damarların spazmı və qan dövranının azalması ilə əlaqəlidir. Lakin onun dəqiq səbəbləri tam müəyyən edilməyib.
Əlamətləri yüngülləşdirmək üçün soyuqdan və stressdən uzaq durmaq, əlcək geyinmək, lazım gəldikdə isə həkimin təyin etdiyi dərmanlardan istifadə etmək tövsiyə olunur.
Dırnaqlarda solğun zolaqlar
Dırnaqlarda solğun və ya ağ xətlər yaranması anemiyanın əlaməti ola bilər. Anemiya zamanı orqanizmdə toxumalara oksigen daşıyan qırmızı qan hüceyrələrinin sayı kifayət qədər olmur.
Dəqiq diaqnoz üçün qan analizi aparılmalıdır. Müalicə bəzi hallarda dəmir preparatlarının qəbulunu nəzərdə tutur. Lakin bunun üçün əvvəlcə həkim müayinəsi və tibbi nəzarət vacibdir.
Əllərdə və dırnaqlarda yaranan hər dəyişiklik ciddi xəstəlik demək deyil. Ancaq əlamətlər uzun müddət davam edir, təkrarlanır və ya başqa narahatlıqlarla birlikdə müşahidə olunursa, səbəbi özbaşına müəyyənləşdirmək əvəzinə həkimə müraciət etmək daha təhlükəsizdir.
