Qrip mövsümündə immuniteti necə gücləndirmək olar? Dietoloqlar bağırsaq sağlamlığının əhəmiyyətini, hansı qidaların orqanizmin müdafiə sistemini dəstəklədiyini və soyuqdəymə zamanı süd içməyin selik ifrazını artırıb-artırmadığını izah ediblər.
Bu barədə “Fox News” nəşri məlumat yayıb.
İmmunitet bağırsaq sağlamlığı ilə əlaqəlidir
ABŞ-ın Nyu-Cersi ştatından olan dietoloq Erin Palinski-Veyd bildirir ki, bağırsaqların vəziyyəti immun sisteminin fəaliyyəti ilə sıx bağlıdır. Qida rasionunda lifin, fermentləşdirilmiş məhsulların və zəruri qida maddələrinin çatışmazlığı bağırsaq mikroflorasının tarazlığını poza, orqanizmin müdafiə funksiyalarına mənfi təsir göstərə bilər.
Mütəxəssislərin əsas tövsiyələrindən biri tərəvəz və meyvələrlə zəngin, müxtəlif qidalanmadır. Bolqar bibəri, kivi, sitrus meyvələri və brokoli immun sisteminin normal fəaliyyəti üçün vacib olan C vitamini ilə zəngindir.
Təbii yoqurt, kefir və kələm turşusu kimi fermentləşdirilmiş məhsullar da bağırsaq mikrobiomunun sağlamlığını dəstəkləməyə kömək edir. Lobya, qoz-fındıq və müxtəlif toxumlar isə lif mənbəyidir.
İmmunitet üçün zülal və sink də vacibdir
Dietoloqlar immun hüceyrələrinin yaranması və normal fəaliyyəti üçün zülal və sinkin əhəmiyyətini də vurğulayırlar. Bu maddələri yağsız ət, dəniz məhsulları, yumurta, balqabaq tumu və noxuddan almaq mümkündür.
Cənubi Karolina ştatından olan dietoloq Loren Manaker adi inək südünün də faydalı qida maddələri ilə zəngin olduğunu bildirir. Südün tərkibində A və D vitaminləri, sink və selen var. Bu maddələr immun sisteminin normal fəaliyyətinin qorunmasında iştirak edir. Bundan başqa, süd orqanizmin maye ehtiyacının ödənilməsinə kömək edir.
Soyuqdəymə zamanı süd içmək seliyi artırırmı?
Soyuqdəymə zamanı süd və süd məhsullarının selik ifrazını artırdığı barədə geniş yayılmış fikir elmi baxımdan inandırıcı sübutlarla təsdiqlənməyib.
Mayo Klinikasının məlumatına görə, süd tüpürcəklə qarışdıqda ağızda və boğazda daha qatı hiss yarada bilər. Bu, bəlğəmin artdığı təəssüratını yaratsa da, orqanizmin həqiqətən daha çox selik istehsal etməsi demək deyil.
Laktoza dözümsüzlüyü olan insanlar laktozasız südə üstünlük verə bilərlər. Belə süd adi süddəki əsas qida maddələrini saxlayır, lakin tərkibində laktoza olmur.
Su və yuxu da immunitet üçün əhəmiyyətlidir
İmmunitetin normal fəaliyyətini dəstəkləmək üçün kifayət qədər maye qəbul etmək vacibdir. Su, bulyon, yaşıl çay və zəncəfil çayı orqanizmin maye balansını qorumağa kömək edir. Tənəffüs yollarının nəmli qalması da əhəmiyyətlidir, çünki bu yollar orqanizmin respirator infeksiyalara qarşı müdafiəsində iştirak edir.
Bununla yanaşı, mütəxəssislər keyfiyyətli yuxuya, fiziki aktivliyə və stressin idarə olunmasına diqqət yetirməyi tövsiyə edirlər. Bu amillər orqanizmin normal fəaliyyəti üçün vacibdir.
Vitamin əlavələrinə gəlincə, onlar müəyyən qida maddələrinin çatışmazlığı zamanı faydalı ola bilər. Lakin dietoloqlar vitamin qəbul etməzdən əvvəl həkimlə məsləhətləşməyi və tövsiyə olunan dozalara əməl etməyi məsləhət görürlər. Vitaminlərin miqdarını özbaşına artırmaq əlavə fayda verməyə bilər, bəzi hallarda isə sağlamlığa zərər yetirə bilər.
Sunay Aydın
