Azərbaycandakı Rus İcmasının üzvləri bu gün Laçın-Xankəndi yolunda aksiya keçirilən əraziyə gəliblər.
Azərbaycandakı Rus İcması sədrinin birinci müavini Dmitri Anisimov, Vətən müharibəsi qaziləri Denis Quzlyayev, Pavel Zorin, Birinci Qarabağ müharibəsində şəhid olmuş Milli Qəhrəman Yuri Kovalyovun qızları Regina Kovalyova, Yuluana Kovalyova, jurnalist Anastasiya Lavrina, Vətən müharibəsi şəhidi Dmitri Solntsevin bacısı oğlu Anar Süleymanov və digərləri aksiyanın gedişini işləyib, etirazçılarla görüşüb, söhbət ediblər.
Qeyd edək ki, Rusiya sülhməramlılarının müvəqqəti nəzarəti altında olan Azərbaycan ərazilərində faydalı qazıntı yataqlarının qanunsuz istismarına etiraz olaraq eko-fəallar və QHT təmsilçiləri ötən il dekabrın 12-dən Laçın-Xankəndi yolunda aksiya keçirirlər.
Aksiyanı gecə-gündüz, fasiləsiz davam etdirən aksiya iştirakçıları humanitar məqsədli yüklərin yoldan sərbəst keçidi üçün heç bir maneə yaratmırlar. Gün ərzində Rusiya sülhməramlılarının təminat avtomobilləri, humanitar təyinatlı yüklər, eləcə də Beynəlxalq Qızıl Xaç Komitəsinin maşınları aksiya keçirilən yerdən hər iki istiqamətə sərbəst hərəkət edir. (APA)
