Azərbaycan sığorta bazarının aparıcı şirkətlərindən olan dövlətə məxsus “Azərsığorta” şirkəti filial şəbəkəsinin transformasiyası layihəsi çərçivəsində yeni konseptdə qurulmuş ilk filialının rəsmi açılışını edib.
Şirkətin mətbuat katibliyindən verilən məlumata görə, strateji inkişaf planına uyğun olaraq yeni konsetpdə istifadəyə verilən ilk filial Bakı şəhəri, Xətai rayonu, Nəcəfqulu Rəfiyev küçəsi 29 ünvanında yerləşən “Paytaxt” filialı olub.
Yeni filial müştərilərə yüksək səviyyədə keyfiyyətli xidmət göstərmək üçün bütün zəruri şəraitə və imkanlara malikdir. Belə ki, paytaxt sakinləri yeni konsepsiyada təmir edilmiş filiala yaxınlaşmaqla “Azərsığorta” şirkətinin təklif etdiyi icbari və könüllü sığorta növlərindən faydalana bilərlər.
Şirkətin İdarə Heyəti sədrinin müşaviri Ceyhun Qurbanlı açılış mərasimində çıxış edərək bildirib ki, filialların yeni konseptdə qurulmasında əsas məqsəd əməkdaşların iş şəraitinin yaxşılaşdırılması ilə yanaşı, müştərilərə göstərilən sığorta xidmətlərinin operativliyini və keyfiyyətini daha da artırmaqdır: “Ümid edirəm ki, yeni filialımız vasitəsi ilə müştərilərə sığorta məhsullarının əlçatanlığını təmin etməklə onların sığorta xidmdətlərinə ayıracağı vaxtı minimuma endirəcəyik. Əsas strateji hədəflərimizdən biri olan müştəri məmnuniyyəti səviyyəsini daha da yüksəltməkdir. İnanıram ki, “Azərsığorta” şirkətində aparılan yenilənmə işləri bundan sonra da uğurla davam etdiriləcək” , – deyə C.Qurbanlı qeyd edib.
Qeyd edək ki, rəsmi açılış mərasimində “Azərsığorta” şirkətinin rəhbər heyəti və digər qonaqlar iştirak edib.
Xatırladaq ki,“Azərsığorta” Dövlət Sığorta Kommersiya Şirkəti Cənubi Qafqazın ilk sığorta qurumu olaraq 21 oktyabr 1921-ci ildə Azərbaycan SSR-də yerli Dövlət Sığorta İdarəsi kimi fəaliyyətə başlayıb. 1991-ci ildə Azərbaycan Respublikasının Maliyyə Nazirliyi yanında fəaliyyət göstərən Dövlət Sığortası İdarə heyəti bazasında Azərbaycan Respublikası Dövlət Sığorta Kommersiya Şirkəti yaradılıb.
Hazırda “Azərsığorta” brendi ilə fəaliyyətini uğurla davam etdirən “Azərsığorta” Dövlət Sığorta Şirkəti 36 növdə könüllü və icbari sığorta məhsulları üzrə xidmətlər təqdim etməklə respublikada geniş filial şəbəkəsinə malikdir.
