Xalq təbabəti
Min illər əvvəl insanlar təbiətin gücündən istifadə edərək bir çox xəstəliyə çarə tapırdı. Maraqlıdır ki, bu gün müasir tibbin də təsdiqlədiyi “qədim xalq təbabəti” üsulları mövcuddur. Mütəxəssislər bildirir ki, bəzi qədim müalicə metodları elmi tədqiqatlarla təsdiqlənib və indi də istifadə olunur.
AzPost bildirir ki, birinci məşhur üsul bal və zəncəfil qarışığıdır. Orta əsrlərdə bu qarışıq öskürək, soyuqdəymə və immunitet zəifliyi üçün istifadə olunurdu. Müasir tibb isə təsdiqləyib ki, bal antibakterial, zəncəfil isə iltihabəleyhinə təsir göstərir. İkinci maraqlı üsul isə gülab suyu ilə göz yorğunluğunu aradan qaldırmaqdır. Bu metod həm Hindistanda, həm də Osmanlı dövründə geniş yayılmışdı.
Üçüncü üsul sarımsağın mikrobəleyhinə gücündən istifadədir. Qədim Misirdə sarımsaq iltihab və infeksiyalara qarşı təbii dərman sayılırdı. Dördüncü isə isti duz torbasıdır. Boyun, bel və oynaq ağrılarına qarşı tətbiq olunan bu üsul müasir fizioterapiyada da istifadə edilir.
Beşinci üsul limon qabığının baş ağrısına qarşı alın nahiyəsinə sürtülməsidir. Altıncı — isti suda ayaq vanna qəbul etmək, yorğunluq və yuxusuzluq üçün qədim dövrlərdən bəri işlənir. Nəhayət, yeddinci üsul isə qara zirə yağıdır. Qədim ərəb təbabətində bütün dərdlərin dərmanı sayılan bu yağ, müasir tədqiqatlarda immunitet gücləndirici kimi təsdiq olunub.
Mütəxəssislər tövsiyə edir ki, “qədim xalq təbabəti” üsullarından istifadə edərkən həkimlə məsləhətləşmək də vacibdir.
