Yay aylarında insanların əksəriyyəti susuzluğun qarşısını almaq üçün yalnız su içməyin kifayət etdiyini düşünür. Həkimlər isə xəbərdarlıq edirlər ki, 35-40 dərəcə isti havada orqanizm təkcə su deyil, həm də natrium, kalium və maqnezium kimi mühüm mineralları itirir. Bu maddələrin çatışmazlığı isə böyrəklərin fəaliyyətinə və ürək-damar sisteminə ciddi təsir göstərə bilər.
Mütəxəssislərin sözlərinə görə, gün ərzində uzun müddət günəş altında qalan insanlar tər vasitəsilə saatda bir litrə qədər maye itirə bilirlər. Əgər bu itki yalnız adi su ilə kompensasiya olunursa, qanda elektrolit balansı pozula bilər. Bu vəziyyət başgicəllənmə, halsızlıq, əzələ spazmları, ürək ritminin dəyişməsi və hətta böyrək funksiyasının müvəqqəti zəifləməsinə səbəb ola bilər.
Nefroloqlar bildirirlər ki, isti aylarda böyrək daşı ilə xəstəxanaya müraciət edənlərin sayı artır. Bunun əsas səbəbi sidiyin daha qatı olması və mineralların kristallaşmasının sürətlənməsidir. Gündəlik 2-2,5 litr maye qəbul etmək tövsiyə olunsa da, fiziki aktivlik və temperatur yüksəldikcə bu miqdar artırılmalıdır.
Mütəxəssislər qazlı içkilər, çox şirin şirələr və yüksək kofeinli içkilərin suyun yerini tutmadığını da xatırladırlar. Əksinə, onlar orqanizmdən əlavə maye itkisinə səbəb ola bilər.
Yay aylarında ən faydalı seçimlər adi su, ayran, şəkərsiz mineral su və kaliumla zəngin meyvələr hesab olunur. Xüsusilə qarpız, yemiş və xiyar həm maye, həm də mineral ehtiyatlarının bərpasına kömək edir.
Həkimlər bildirirlər ki, sidiyin rəngi tündləşirsə, ağız quruluğu yaranırsa və baş ağrıları artırsa, bu, orqanizmin artıq susuzlaşmağa başladığını göstərən ilk siqnallardır.
