Kardioloqlar milyonlarla insanın gündəlik istifadə etdiyi məşhur bir sousun damar sağlamlığına təsirinə diqqət çəkiblər. Söhbət mayonezdən gedir.
Mütəxəssislərin fikrincə, mayonezin tez-tez və böyük porsiyalarda qəbul edilməsi artıq çəkiyə səbəb ola, bu isə ürək-damar xəstəlikləri və damarların aterosklerozla zədələnməsi riskini artıra bilər.
Bu barədə “Parade” nəşri yazıb.
Damarlarda lövhələr necə yaranır?
Arteriyaların daralması və ya tıxanması xolesterin, kalsium və iltihabi maddələrin damar divarlarında tədricən toplanması nəticəsində baş verə bilər.
Zaman keçdikcə bu proses damarlarda aterosklerotik lövhələrin yaranmasına və qan axınının pozulmasına gətirib çıxara bilər.
Mayonez niyə diqqət tələb edir?
Mütəxəssislər mayonezdən tamamilə imtina etməyə çağırmırlar. Əsas məsələ porsiyanın ölçüsüdür. Mayonez yüksək kalorili məhsuldur. Onun müntəzəm olaraq böyük miqdarda qəbul edilməsi artıq çəkiyə səbəb ola bilər. Artıq çəki isə orqanizmdə iltihabi proseslərin və ateroskleroz riskinin artması ilə əlaqələndirilir.
Sertifikatlı invaziv kardioloq, tibb elmləri doktoru Çen-Han Çenin sözlərinə görə, mayonez balanslaşdırılmış qidalanmanın bir hissəsi ola bilər.
“Əsas narahatlıq doğuran məsələ porsiyanın ölçüsüdür”, – həkim bildirib.
Ürək və damarları qorumaq üçün nə etmək olar?
Mütəxəssislər mayonezdən istifadə edənlərə bir sıra sadə qaydalara əməl etməyi tövsiyə edirlər:
-Mayonezi böyük miqdarda yemək əvəzinə, yeməklərə kiçik porsiyalarla əlavə etmək;
-Məhsulun tərkibinə diqqət yetirmək və daha yüngül variantlara üstünlük vermək;
-Yalnız bir məhsula deyil, gündəlik qidalanmanın ümumi kaloriliyinə nəzarət etmək;
-Artıq çəkinin yaranmasına yol verməmək.
Beləliklə, problem mayonezin özündən çox, onun həddindən artıq və müntəzəm istifadəsi ilə bağlıdır. Balanslı qidalanma və porsiyalara nəzarət ürək-damar sağlamlığının qorunmasında əsas amillərdən biridir.
Sunay Aydın
