Müxalifət partiyaları boş qalmış deputat yerlərinə seçkidə iştirak edəcək? –"Qatılacağıq...Yorulmuşam..." (RƏYLƏR)
User
02 Fevral 2022 - 16:20

Milli Məclisdə boş qalmış deputat yerlərinə seçkilərin keçiriləcəyi ilə bağlı məlumatlar səslənir.

Ötən ilin dekabrında MSK-nın sədri Məzahir Pənahov mediaya açıqlamasında demişdi ki, Milli Məclisdə boş qalan yerlərə seçkilərin keçirilməsi yaxın vaxtlarda mümkün olacaq.
Bəs ölkənin siyasi partiyaları bu seçkilərə qatılacaqmı?
REAL partiyası deputat mandatı uğrunda marafonda iştirak etmək niyyətindədir.
“Biz Milli Məclisə boş qalan yerlərə keçiriləcək seçkilərdə iştirak etməyi düşünürük”-deyə Azpost.info-ya açıqlamasında Respublikaçı Alternativ Partiyasının (REAL) icra katibi Natiq Cəfərli deyib.
O əlavə edib ki, REAL-ın prinsiplərindən biri də siyasi partiyaların seçkilərdə iştirakıdır. “Siyasi partiyalar istənilən seçkidən kənarda qalmamalıdır. Çünki siyasi partiyaların əsas vəzifələrindən biri də seçkilərə hazırlaşmaq və iştirak etməkdir”.

Azərbaycan Demokrat Partiyası (ADP) isə təkrar seçkilərə qatılmaq niyyətində deyil. Partiya sədri Sərdar Cəlaloğlunun sözlərinə görə, bu məsələni tərədarları ilə müzakirə edib və bu qənaətə gəlib ki, seçkilərə qatılmamaq daha məqsədəuyğundur. “Partiyada seçkilərə qatılmaq meyli yoxdur. Açığı özüm də seçki ilə bağlı qanunsuzluqlardan yorulmuşam. Ona görə də seçkilərə qatılmaq niyyətim yoxdur”, – deyə ADP sədri qeyd edib.

Klassik Xalq Cəbhəsi Partiyası (KXCP) təkrar seçkilərdən kənarda qalacaq. Partiya sədrinin müavini Xəzər Teyyublu bildirib ki, təkrar seçkilər 2020-ci ildə keçirilən seçkilərin davamı olacaq. “Biz 2020-ci ildə keçirilən seçkilərə də qatımamışdıq. Təkrar seçkilər də həmin prosesin davamıdır. Ona görə də seçkilərə qatılmayacağıq və bu məsələ partiyada müzakirə mövzusu deyil”, – deyə KXCP yetkilisi əlavə edib.

Qeyd edək ki, hazırda parlamentdə beş deputat yeri boşdur. Mərkəzi Seçki Komissiyası Milli Məclisə seçki zamanı ümumilikdə 4 dairədə keçirilmiş seçkinin nəticələrini ləğv edib:

– 80 saylı İmişli-Beyləqan seçki dairəsi – lider namizəd Çingiz Qənizadə
– 74 saylı Lənkəran kənd seçki dairəsi – lider namizəd Hadı Rəcəbli
– 35 saylı Xətai üçüncü seçki dairəsi – lider namizəd Rauf Arifoğlu
– 33 saylı Xətai birinci seçki dairəsi – lider namizəd Hüseynbala Mirələmov.
Həmçinin 116 saylı Qəbələ seçki dairəsindən seçilmiş Fəttah Heydərov 04.08.2020-ci ildə dünyasını dəyişdiyindən onun da yeri boşdur.
55 saylı Xaçmaz şəhər dairəsindən Milli Məclisin deputatı Eldəniz Səlimov həbs olunduğu üçün deputatlığına xitam verilib.

Azpost.info 

Bir cavab yazın

Sizin e-poçt ünvanınız dərc edilməyəcəkdir. Gərəkli sahələr * ilə işarələnmişdir

Əvvəlki məqalə

Ziya Məmmədovun qardaşının məhkəməsi başlayıb

02 Fevral 2022 - 16:04
Sonrakı məqalə

“Elə bir gənc nəsil yetişdi ki, Vətən uğrunda ölümə gedirdilər” –

02 Fevral 2022 - 17:05