Rusiyanın müəmmalı UVB-76 radiostansiyası, radio həvəskarları arasında “Jujjalka” (The Buzzer) adı ilə tanınan stansiya növbəti dəfə sirli şifrəli mesajlar yayımlayıb. Mesajların mənası isə hələ də məlum deyil.
Azpost.info bildirir ki, bu barədə LAD Bible nəşri yazıb.
Məlumata görə, radiostansiyaya maraq Rusiyaya məxsus olduğu ehtimal edilən X-101 qanadlı raketinin qalıqlarının Polşa sərhədindən təxminən 88 kilometr aralıda aşkarlanmasından sonra daha da artıb. Polşanın Baş naziri Donald Tusk hadisə yerində tapılan qalıqların ilkin qiymətləndirməyə əsasən Rusiya istehsalı olan X-101 raketinə aid ola biləcəyini bildirib.
Efirdə hansı sözlər səslənib?
Son yayımlardan birində radiostansiya aşağıdakı sözləri səsləndirib:
“Rüşvətxor”
“Seksofat”
“Monarxist”
“Otel”
“Muzopayus”
“Təmkinli”
“Levretka”
Bu sözlərin bəzilərinin adi mənası məlum olsa da, mütəxəssislər onların hərbi şifrləmə sistemində hansı məna daşıdığını izah edə bilmirlər.
Əvvəlki yayımlarda isə “Qəfəs” və “Nedotopa” kimi kod sözləri səsləndirilmişdi.
Sirr onilliklərdir açılmır
Londondakı Şəhər Universitetinin elektronika və radio mühəndisliyi professoru Devid Stappls hesab edir ki, UVB-76 Rusiyanın dövlət strukturlarının nəzarətində fəaliyyət göstərir.
Onun sözlərinə görə, əgər radiostansiya həqiqətən də rəsmi qurumlar tərəfindən idarə olunursa, onun mülki məqsədlər üçün istifadə edilməsi ehtimalı çox aşağıdır.
Buna baxmayaraq, Rusiya hakimiyyəti indiyədək UVB-76-nın mövcudluğunu və təyinatını rəsmi şəkildə təsdiqləməyib.
Radiostansiya illərdir fasiləsiz monoton uğultu yayımlayır və bu səs vaxtaşırı şifrəli sözlər və rəqəmlərdən ibarət səsli mesajlarla kəsilir.
Mütəxəssislər nə düşünür?
Ekspertlər arasında ən geniş yayılmış ehtimallardan biri budur ki, bu cür mesajların əsas məqsədi onların kənar şəxslər tərəfindən deşifrə edilməsinin mümkünsüz olmasıdır.
Bəzi tədqiqatçılar UVB-76-nın Sovet dövründə yaradıldığı deyilən və Qərbdə “Dead Man’s Switch” kimi tanınan “Perimetr” nüvə cavab sistemi ilə əlaqəli ola biləcəyini iddia edirlər. Bu versiyaya görə, radiostansiyanın fasiləsiz siqnalı fövqəladə vəziyyətdə avtomatik cavab mexanizminin elementlərindən biri ola bilər.
Bununla yanaşı, radiostansiyanın naməlum uçan obyektlər (UNO) və ya şüurun idarə olunması texnologiyaları ilə əlaqələndirilməsi kimi fərziyyələr də mövcuddur. Lakin mütəxəssislər bu iddiaları elmi əsaslara söykənməyən ehtimallar hesab edirlər.
N.Talıblı
